រើសបានក្រពើដ៏ធំមួយក្បាលមិនដឹងយកទៅណា ក៏ដឹកទៅប្រគេនព្រះសង្ឃនៅក្នុងវត្ត
ខេត្តបន្ទាយមានជ័យ ៖ ក្រពើ១ក្បាលមានទម្ងន់ជិត៣០គីឡូក្រាម ត្រូវបានអ្នកស្រុកប្រទះឃើញនៅតាមផ្លូវ ខណៈត្រឡប់មកពីទិញអីវ៉ាន់ ហើយក៏បានយកមកប្រគេនព្រះសង្ឃនៅវត្តរលំជ្រៃ ស្ថិតក្នុងភូមិរលំជ្រៃ ឃុំភូមិថ្មី ស្រុកថ្មពួក កាលពីថ្ងៃទី៧ ខែកុម្ភៈ ឆ្នាំ២០២៣កន្លងទៅ ដើម្បីប្រកាសរកអ្នកដែលបាត់ក្រពើឲ្យមកទទួលយកទៅវិញ ។
លោក ម៉ៅ មើន នាយប៉ុស្តិ៍នគរបាលឃុំភូមិថ្មី បានថ្លែងថា ប្រជាពលរដ្ឋដែលត្រឡប់មកពីទិញអីវ៉ាន់នៅខេត្តសៀមរាបតាមរថយន្ត បានប្រទះឃើញក្រពើ១ក្បាលនេះ ដែលមានចំណងចងមាត់ និងខ្សែចងស្លាបសេកជើងមុខ ហើយបើតាមពិនិត្យមើល គឺអាចជាក្រពើដែលបានជ្រុះនៅលើផ្លូវជាតិលេខ៦នោះ ។ ដោយខ្លាចរថយន្តមកពីក្រោយកិន ទើបពួកគាត់រើសដាក់រថយន្តដឹកយកមកប្រគេនព្រះសង្ឃនៅវត្តរលំជ្រៃបែបនេះទៅ ។ ក្រពើ១ក្បាលនេះ ត្រូវពួកគាត់រើសបានកាលពីវេលាម៉ោងប្រមាណ៥និង៣០នាទីថ្ងៃទី៧ ខែកុម្ភៈ ឆ្នាំ២០២៣ ក្នុងទឹកដីខេត្តសៀមរាប ។
ទោះបីជាបែបណា ក្រុមមន្ត្រីទទួលព័ត៌មានបានឱ្យដឹងថា ពេលនេះក្រពើ១ក្បាលនោះ ត្រូវបានគេយកទៅលែងហើយ តែមិនដឹងថា តើលែងនៅកន្លែងណានោះទេ?៕
Post a Comment