គម្រោងសង់ផ្លូវរថភ្លើងក្រោមដីនៅភ្នំពេញ សិក្សាចប់ហើយ ខណៈសម្តេចតេជោស្នើឱ្យធ្វើផ្លូវរថភ្លើងល្បឿនលឿនទៀត
ក្រុមហ៊ុនចិន China Metro Group បានបញ្ជាក់ទៅកាន់សម្តេចតេជោ ហ៊ុន សែន ថា ខ្លួនបានបញ្ចប់ការសិក្សាលទ្ធភាពគម្រោងសាងសង់ផ្លូវរថភ្លើងក្រោមដីនៅរាជធានីភ្នំពេញហើយ និងបានដាក់បញ្ជូននូវរបាយការណ៍សិក្សាជូនក្រសួងសាធារណការ និងដឹកជញ្ជូន ដើម្បីពិនិត្យ និងពិភាក្សាបន្ត។ ការលើកឡើងនេះ ធ្វើឡើងក្នុងជំនួបពិភាក្សារវាងសម្តេចតេជោ និងក្រុមហ៊ុនវិនិយោគធំៗចំនួន៣ នៃប្រទេសចិន រួមមានក្រុមហ៊ុនសាងសង់គមនាគមន៍ចិន, ក្រុមហ៊ុនសាជីវកម្មស្ពានថ្នល់ចិន និងក្រុមហ៊ុន China Metro Group នៅក្រុងប៉េកាំង កាលពីថ្ងៃទី៩ ខែកុម្ភៈ ឆ្នាំ២០២៣។
ជាមួយគ្នានេះ សម្តេចនាយករដ្ឋមន្រ្តី បានស្នើឲ្យក្រុមហ៊ុន China Metro Group សិក្សាពីគម្រោងវិនិយោគល្បឿនលឿនធុនស្រាលពីរាជធានីភ្នំពេញទៅកាន់អាកាសយានដ្ឋានអន្តរជាតិភ្នំពេញថ្មី និងផ្លូវរថភ្លើងល្បឿនលឿនធុនស្រាលក្នុងរាជធានីភ្នំពេញ ដែលកំពុងមានចរាចរណ៍យ៉ាងមមាញឹក។
ក្រៅពីនេះ ក្រុមហ៊ុនចិនក៏បានជម្រាបជូនសម្តេចតេជោ ពីគម្រោងដឹកជញ្ជូនផ្លូវទឹក និងកំពង់ផែ ដែលក្នុងនោះក្រុមហ៊ុនបានបញ្ចប់ការសិក្សាបឋមគម្រោងស្តារផ្លូវទឹកទន្លេសាប ភ្នំពេញ សៀមរាប ដែលនិងប្រគល់ជូនក្រសួងសាធារណការ និងដឹកជញ្ជូនរួចរាល់ផងដែរ៕
Post a Comment