ផ្ទុះរឿងផ្ទៃក្នុងនៅវិទ្យាល័យពេជ្រចិន្តា «រឿងលោកគ្រូ-អ្នកគ្រូបើកបង្រៀនគួរ»
ខេត្តបាត់ដំបង៖ «វិទ្យាល័យ ពេជ្រចិន្តា» នៅស្រុកភ្នំព្រឹក ដែលគេធ្លាប់ស្គាល់ជាមួយនឹងភាពល្បីល្បាញ តាមរយៈការឈ្នះជ័យលាភីទូទាំងប្រទេស ជាវិទ្យាល័យ «គំរូ ផ្នែកសេវាសាធារណៈ ក្នុងវិស័យអប់រំ» ពេលនេះ ស្រាប់តែផ្ទុះឡើងនូវរឿងអាស្រូវ ពាក់ព័ន្ធនឹងលោកគ្រូ អ្នកគ្រូបើកបង្រៀន
«គួរ»សិស្សក្រៅម៉ោង នៅក្នុងវិទ្យាល័យបែប«ប្រកាន់បក្សពួក» ដែលគេទម្លាក់ទៅលើលោកនាយកវិទ្យាល័យគំរូមួយនេះថា ជាអ្នករៀបចំឲ្យមានភាពរញ៉េរញ៉ៃនេះកើតឡើង រហូតបញ្ឈប់សិស្សមួយចំនួនមិនឲ្យចូលរៀនមួយរយៈខ្លីទៀតផង ព្រោះតែយុវសិស្សទាំងនោះមិនស្ដាប់តាមការណែនាំរបស់លោកនាយក តែលោកនាយកវិទ្យាល័យនេះ បានបដិសេធចំពោះការចោទប្រកាន់នេះ។
ភាគីចោទប្រកាន់ ដែលជាគ្រូបង្រៀនផងដែរ បានផ្ដល់ព័ត៌មានថា បច្ចុប្បន្ន នៅក្នុង«វិទ្យាល័យ ពេជ្រចិន្តា» កំពុងមានភាពចម្រោងចម្រាស់ ប្រទាំងប្រទើសគ្នារវាងលោកគ្រូ អ្នកគ្រូ និង លោកនាយកវិទ្យាល័យក្នុងរឿងដណ្ដើមគ្នាបង្រៀន«គួរ»សិស្សក្រៅម៉ោងនៅក្នុងវិទ្យាល័យ។ ប្រភពនេះបានចង្អុលចំៗថា លោក ប៉ិច ឈឿត នាយកវិទ្យាល័យនេះ គ្រប់គ្រងគ្រូបង្រៀននៅក្នុងវិទ្យាល័យហាក់លំអៀង ប្រកាន់បក្សពួក។ ប្រើអំណាចគាបសង្កត់ គំរាមកំហែង ដាក់សម្ពាធ ឬ ទៅលើលោកគ្រូ អ្នកគ្រូ ឬ កូនសិស្សទាំងឡាយណា ដែលមិនមែនជាបក្សពួកគាត់ ។
ប្រភពទម្លាយព័ត៌មាន ដែលសុំមិនប្រាប់ឈ្មោះរូបនេះបានបញ្ជាក់ថា លោកប៉ិច ឈឿត តែងប្រជុំណែនាំសិស្សគ្រប់ថ្នាក់ ត្រូវតែទៅរៀន «គួរ» ជាមួយលោកគ្រូ អ្នកគ្រូណា ដែលជាបក្សពួករបស់គាត់ តែបើយុវសិស្សណាមិនស្ដាប់ ហើយបែរជាទៅរៀន«គួរ»ជាមួយលោកគ្រូ អ្នកគ្រូផ្សេង ដែលមិនមែនជាបក្សពួកគាត់ទេ យុវសិស្សទាំងនោះនឹងត្រូវលោកនាយករូបនេះដាក់ទណ្ឌកម្មឲ្យឈរហាលថ្ងៃ នៅកន្លែងដងទង់ជាតិ ឬ ត្រូវបញ្ដេញមិនឲ្យចូលរៀនចន្លោះពីមួយសប្ដាហ៍រហូតដល់កន្លះខែ ។
ជាមួយនឹងការចោទប្រកាន់ ប្រភពនេះក៏បានលើកយកឧទាហរណ៏«ទណ្ឌកម្ម»ថ្មីមួយ ដែលគាត់បានចាត់ទុកថា ជា«ករណីជាក់ស្ដែង» បានកើតឡើងកាលពីថ្ងៃទី ០៣ កុម្ភៈ ឆ្នាំ២០២៣នេះ។ គាត់និយាយថា នៅថ្ងៃនោះ លោកនាយកវិទ្យាល័យរូបនេះ បានស្ដីបន្ទោសសិស្ស រួចបានបញ្ឈប់យុវសិស្សថ្នាក់ទី៨C ដែលមានសរុបជាង៥០នាក់ មិនឲ្យចូលរៀនរយៈពេលចន្លោះពីមួយសប្ដាហ៍រហូតដល់កន្លះខែ ដោយសារតែយុវសិស្សទាំងនេះទៅរៀន «គួរ» ជាមួយគ្រូផ្សេង មិនទៅរៀន
«គួរ»ជាមួយគ្រូៗ ដែលជាបក្សពួករបស់គាត់ ។
បើតាមប្រភពដដែលនេះបានបញ្ជាក់ថា ជាមួយគ្នានឹងការបញ្ឈប់សិស្សមួយរយៈពេលខ្លីមិនឲ្យចូលសាលានេះ ថែមទាំងបង្គាប់ឲ្យសិស្សផ្ដិតមេដៃលើកិច្ចសន្យា ឈប់ទៅរៀនគួរជាមួយគ្រូផ្សេងៗទៀតផង។ ដោយសារតែលោកនាយក បញ្ឈប់សិស្សដោយមូលហេតុមិនសមរម្យបែបនេះ ទើបធ្វើឲ្យអាណាព្យាបាលសិស្សមួយចំនួនផ្ទុះប្រតិកម្មតវ៉ា មកសួរនាំគ្រូបង្រៀនប្រចាំថ្នាក់ដល់សាលាជាបន្តបន្ទាប់ ។ លោក ប៉ិច ឈឿត នាយកវិទ្យាល័យ«ពេជ្រ ចិន្តា» បានបដិសេដយ៉ាងដាច់អហង្ការចំពោះការចោទប្រកាន់ពីប្រភពមិនប្រាប់ឈ្មោះនេះ ។
ប៉ុន្តែលោកបានផ្ដល់ចម្លើយតបយ៉ាងជាក់លាក់ត្រឡប់មកវិញថា «ខ្ញុំស្គាល់ហើយ អ្នកដែលផ្ដល់
ព័ត៌មាននេះ ។ គាត់ជាគ្រូបង្រៀន នៅក្នុងវិទ្យាល័យនេះតែម្នាក់គត់ ដែលមិនស្របនឹងគេ»។ តើលោកនាយកបានបញ្ឈប់សិស្សថ្នាក់ទី ៨c មិនឲ្យចូលរៀនដូចការចោទមែនឬទេ កាលពីថ្ងៃសុក្រសប្ដាហ៍មុននេះ ? លោកនាយក បានផ្ដល់ចម្លើយយ៉ាងដូច្នេះថា «ខ្ញុំមិនបានបញ្ឈប់សិស្សដូចការចោទប្រកាន់ទេ ។
ថ្ងៃនោះ ខ្ញុំគ្រាន់តែបានចូលទៅសួរនាំសិស្ស រឿងពួកគេចេញទៅរៀនគួក្រៅសាលា ហើយមិនមែនមានតែសិស្សមួយថ្នាក់ហ្នឹងទេ គឺមានដល់ទៅ០៤ថ្នាក់ឯងណោះ ដែលខ្ញុំបានសួរនាំ តែក៏ពុំបានបញ្ឈប់ពួកគេមិនចូលសាលានោះដែរ គ្រាន់តែឲ្យពួកលើកដៃ តើមានប៉ុន្មាននាក់ដែលបានទៅរៀនគួក្រៅសាលា ? បើតាមការស្ទាបស្ទង់គឺមានប្រហែល១០នាក់ប៉ុណ្ណោះ តែពួកគេនៅតែមករៀនដដែល អត់មានសិស្សណាម្នាក់ត្រូវបានបញ្ឈប់ដូចការចោទនោះទេ»។
ដោយឡែក ពាក់ព័ន្ធនឹងការបែងចែក ឬ ប្រកាន់បក្សពួកវិញ លោកប៉ិច ឈឿត បានបញ្ជាក់ថា នៅក្នុងវិទ្យាល័យរបស់លោក ពុំមានការបែងចែកបក្សពួក ដូចការលើកឡើងខាងលើនេះទេ ។ លោកបានអនុញ្ញាតឲ្យលោកគ្រូ អ្នកគ្រូ បើកបង្រៀន«គួរ» នៅក្នុងវិទ្យាល័យ តែត្រូវបង្រៀនក្រៅម៉ោងរដ្ឋ ហើយក៏មិនអនុញ្ញាតឲ្យបង្រៀនសិស្សនៅតាមផ្ទះដែរ ។ ប៉ុន្តែដោយសារមានគ្រូខ្លះបង្រៀនសិស្សនៅតាមផ្ទះបែបនេះហើយ ទើបគាត់មិនពេញចិត្តនឹងការណែនាំរបស់លោក រហូតផ្ដល់ព័ត៌មានអាក្រក់ពីក្នុងសាលាទៅអ្នកសារព័ត៌មានបែបនេះ ។
ដំណឹងនៃការផ្អាកមិនឲ្យសិស្សចូលរៀនមួយរយៈដោយសាររឿងសិស្សរៀន«គួរ»មិនស្ដាប់តាមការណែនាំរបស់លោកនាយកវិទ្យាល័យនេះ អាណាព្យាបាលសិស្សម្នាក់ គឺអ្នកស្រី ឃុន ឡា បានថ្លែងប្រាប់កោះសន្តិភាព តាមទូរស័ព្ទនៅព្រឹកថ្ងៃទី ០៦ កុម្ភៈនេះថា «កូនខ្ញុំបានទូរស័ព្ទប្រាប់ខ្ញុំពីរឿងគ្រូផ្អាកមិនឲ្យចូលរៀនមួយរយៈនេះដែរ តែខ្ញុំមិនបានដឹងពីមូលហេតុទេ ហើយកូនខ្ញុំក៏មិនបញ្ជាក់ពីមូលហេតុនេះប្រាប់ខ្ញុំជាក់លាក់ដែរ»។
អ្នកស្រី ឡា បានបញ្ជាក់ថា «នៅព្រឹកថ្ងៃទី ០៦ កុម្ភៈ ខ្ញុំបានទៅជួបសួរនាំរឿងនេះដល់សាលាដែរ នៅតែពុំមានលោកគ្រូ ឬ អ្នកគ្រូនិយាយពីមូលហេតុប្រាប់ខ្ញុំទេ។ រីឯលោកគ្រូម្នាក់ឈ្មោះ ម៉េត ដែលបង្រៀនកូនខ្ញុំ ក៏មិនបានបញ្ជាក់ពីមូលហេតុច្បាស់លាក់ដែរ។ លោកគ្រូម៉េត គ្រាន់តែប្រាប់ខ្ញុំថា គេពិតជាបានផ្អាកមិនឲ្យសិស្សថ្នាក់ដែលកូនខ្ញុំរៀនមួយរយៈមែន»។ ស្ថិតក្នុងស្ថានភាពបែបនេះ អ្នកស្រីក៏បានបង្ហាញនូវភាពមិនច្បាស់លាស់ដែរថា «កូនខ្ញុំ រៀននៅសាលាឆ្ងាយពីផ្ទះណាស់ ហើយមានជំងឺផង ពេលនេះ មានបញ្ហាក្នុងសាលាទៀត ខ្ញុំចង់សុំផ្ទេរយកកូនខ្ញុំ ទៅរៀននៅសាលាជិតផ្ទះ ក្នុងឃុំបារាំងធ្លាក់ ស្រុកភ្នំព្រឹកវិញ ដើម្បីងាយស្រូលមើលខុសត្រូវកូន តែមិនដឹងគេឲ្យទៅបានឬអត់នោះទេ»។
បន្ថែមលើការមិនចុះសម្រុងគ្នារវាងលោកគ្រូ អ្នកគ្រូមួយចំនួន ជាមួយលោកនាយកនៃវិទ្យាល័យ
«ពេជ្រចិន្តា» ដែលចោទគ្នាទៅវិញទៅមកនេះ ប្រភពដែលសុំមិនប្រាប់ឈ្មោះ ហាក់មិនស្ងប់ចិត្តទេ គាត់បានសំណូមសុំឲ្យថ្នាក់ក្រសួងអប់រំ យុវជន និងកីឡា បង្កើតក្រុមការងារ«ឯករាជ»ចុះធ្វើការស្រាវជ្រាវផ្ទាល់ដល់មូលដ្ឋាន ដល់វិទ្យាល័យ និងសួរនាំដល់អាណាព្យាបាលសិស្ស ឬ មន្ត្រីពាក់ព័ន្ធនានាផង លើករណីនេះ ដោយមិនលំអៀង នឹងអាចរកឃើញសខ្មៅជាក់ជាមិនខាន ។
វិទ្យាល័យ«ពេជ្រចិន្តា» ស្ថិតនៅឃុំពេជ្រចិន្តា ស្រុកភ្នំព្រឹក ធ្លាប់មានប្រវត្តិឈ្នះជ័យលាភីទូទាំងប្រទេស កាលពីអំឡុងឆ្នាំ២០១៩ ជាប់ឈ្មោះជាវិទ្យាល័យ«គំរូ ផ្នែកសេវាសាធារណៈ ក្នុងវិស័យអប់រំ»។ នេះបើតាមលោក ប៉ិច ឈឿត នាយកវិទ្យាល័យ ដែលកំពុងផ្ទុះរឿងអាស្រូវផ្ទៃក្នុងខាងលើនេះ បានបង្ហាញមោទនភាព ប្រាប់កោះសន្តិភាព ។ វិទ្យាល័យពេជ្រចិន្តា មានបន្ទប់សិក្សាប្រមាណ ២៩បន្ទប់ ចាប់ពីថ្នាក់ទី៧ រហូតដល់ថ្នាក់ទី១២ មានលោកគ្រូ អ្នកគ្រូ បង្រៀនប្រមាណ៤០នាក់ និង មានសិស្សានុសិស្សប្រមាណ១,៥០០នាក់ ។
ជាមួយនឹងភាពចម្រោងចម្រាសផ្ទៃក្នុងដែលកំពុងផ្ទុះក្ដៅគគុកបែបនេះ លោក ប៉ិច ឈឿត នាយកវិទ្យាល័យនេះ បានបញ្ជាក់ប្រាប់ដែរថា លោកនឹងអញ្ជើញអាណាព្យាបាលសិស្សមកប្រជុំនិយាយពីបញ្ហាខាងលើនេះ ឲ្យបានច្បាស់លាស់ នៅចំពោះមុខលោកគ្រូ អ្នកគ្រូទាំងអស់នៅក្នុងវិទ្យាល័យ ជៀសវាងកុំឲ្យបញ្ហានេះមានវិវាទកាន់តែធំ។
Post a Comment