ចិនចោទអូស្ត្រាលីបំពានអំណាចរដ្ឋ ជុំវិញការដកផលិតផលកាមេរ៉ារបស់ចិនចេញពីអគាររដ្ឋាភិបាល
ប្រទេសចិន :÷ កាលពីថ្ងៃព្រហស្បតិ៍បានចោទប្រកាន់អូស្ត្រាលីពីបទរំលោភអំណាចរដ្ឋ ដោយធ្វើសកម្មភាពរើសអើងប្រឆាំងនឹងផលិតផលរបស់ខ្លួន ខណៈដែលក្រសួងការពារជាតិអូស្ត្រាលីបានបញ្ជាឱ្យដកកាមេរ៉ាសុវត្ថិភាពដែលជាផលិតផលរបស់ក្រុមហ៊ុនចិន ចេញពីអគាររដ្ឋាភិបាលសំខាន់ៗ ដោយមានការព្រួយបារម្ភអំពីសុវត្ថិភាពសន្តិសុខជាតិ ។
ការប្រកាសដកមេរ៉ាសុវត្ថិភាពនេះបានធ្វើឡើង ក្រោយសវនកម្មផ្ទៃក្នុងក្រសួងការពារជាតិរបស់ទីក្រុងកង់បេរ៉ា បានរកឃើញថាមានកាមេរ៉ាដែលផលិតដោយក្រុមហ៊ុនចិនយ៉ាងតិច ១,០០០ គ្រឿង ត្រូវបានដំឡើងនៅទូទាំងហេដ្ឋារចនាសម្ព័ន្ធនយោបាយ និងអគាររដ្ឋាភិបាលសំខាន់ៗ ដែលអាចមានការស៊ើបការសម្ងាត់ ឬទាញយកទិន្នន័យណាមួយពីរបស់រដ្ឋាភិបាល។
ជុំវិញការចោទប្រកាន់ អ្នកនាំពាក្យក្រសួងការបរទេសចិន លោកស្រី ម៉ៅ នីង បាននិយាយនៅក្នុងសន្និសីទសារព័ត៌មានមួយថា៖« យើងប្រឆាំងនឹងការអនុវត្តខុសឆ្គងនៃការពង្រីកគំនិតសន្តិសុខជាតិ និងរំលោភអំណាចរដ្ឋ ដោយបានរើសអើង និងគាបសង្កត់ក្រុមហ៊ុនចិន»។
ទីក្រុងកង់បេរ៉ាបានសម្តែងការព្រួយបារម្ភអំពីក្រុមហ៊ុនកាមេរ៉ាសុវត្ថិភាព Hikvision និង Dahua ដែលមានការទាក់ទងជាមួយរដ្ឋាភិបាលចិន ។ ទន្ទឹមនេះរដ្ឋមន្ត្រីការបរទេសអូស្ត្រាលី លោកស្រី Penny Wong បាននិយាយថា រដ្ឋាភិបាលអូស្ត្រាលី គ្រោងនឹងពន្លឿនការជំនួសកាមេរ៉ាដែលផលិតដោយក្រុមហ៊ុនចិន ដោយបន្ថែមថា កាមេរ៉ាថ្មីនឹងមានសុវត្ថិភាពជាងមុនសម្រាប់ប្រតិបត្តិការនៅក្នុងអគាររដ្ឋភិបាលមានភាពរសើប ដូចជាក្នុងវិស័យការពារជាតិ និងក្រសួងកិច្ចការបរទេស។
គួរកត់សម្គាល់ថាកាមេរ៉ាសុវត្ថិភាព ប្រព័ន្ធអេឡិចត្រូនិក និងឧបករណ៍ថតវីដេអូដែលផលិតដោយក្រុមហ៊ុនចិន Hikvision និង Dahua ស្ថិតក្នុងចំណោមក្រុមហ៊ុនបច្ចេកវិទ្យាផ្សេងទៀតដែលមានមូលដ្ឋាននៅទីក្រុងប៉េកាំង ត្រូវបានគេរកឃើញថាមានទំនាក់ទំនងជាមួយបក្សកុម្មុយនិស្តចិនដែលកំពុងកាន់អំណាច (CPC) របស់មេដឹកនាំផ្តាច់ការលោក ស៊ី ជីនពីង។ ផលិតផលទាំងនោះភាគច្រើនត្រូវបានគេដំឡើងនៅក្នុងអគារនៃក្រសួងការពារជាតិអូស្ត្រាលី ការបរទេស និងក្រសួងពាណិជ្ជកម្ម។ រដ្ឋមន្ត្រីការពារជាតិអូស្ត្រាលី លោក Richard Marles នៅក្នុងសេចក្តីថ្លែងការណ៍មួយទៅកាន់ក្រុមហ៊ុន Australian Broadcasting Corp ថាអូស្ត្រាលីកំពុងវាយតម្លៃហានិភ័យដែលបង្កឡើងដោយបច្ចេកវិទ្យាឃ្លាំមើលរបស់ចិន។
មិនថាតែទីក្រុងកង់បេរ៉ា ច្បាប់ការពារជាតិរបស់សហរដ្ឋអាមេរិក ក្នុងឆ្នាំ 2019 បានដកហូតកាមេរ៉ាចិនរាប់ពាន់គ្រឿង ដើម្បីរារាំងការគំរាមកំហែងពីចារកម្ម។ ក្រសួងការបរទេសសហរដ្ឋអាមេរិកក៏បានធ្វើវិសោធនកម្មលើកិច្ចព្រមព្រៀងដឹកជញ្ជូន និងអាជ្ញាបណ្ណខ្សែសង្វាក់ផងដែរ ដើម្បីហាមឃាត់បច្ចេកវិទ្យាផលិតរបស់ចិន។ ក្នុងនោះសហរដ្ឋអាមេរិកក៏បានដាក់ឈ្មោះក្រុមហ៊ុនចិន Zhejiang Dahua Technology Co. និងក្រុមហ៊ុន Hangzhou Hikvision Digital Technology Co. ទៅក្នុងចំណោមក្រុមហ៊ុនដែលបង្កើនការព្រួយបារម្ភអំពីសន្តិសុខជាតិ។
កាលពីឆ្នាំមុន ចក្រភពអង់គ្លេសក៏បានបញ្ឈប់ការដំឡើងកាមេរ៉ាសុវត្ថិភាពដែលផលិតដោយក្រុមហ៊ុនចិននៅក្នុងអគាររដ្ឋាភិបាល និងកន្លែងដែលមានភាពរសើប។ ចក្រភពអង់គ្លេសបានគូសបញ្ជាក់ថា ក្រុមហ៊ុនទាំងពីរគឺ Hikvision និង Dahua ត្រូវបានទាមទារឱ្យឋិតនៅក្រោមច្បាប់ស៊ើបការណ៍សម្ងាត់ជាតិរបស់ប្រទេសចិន ២០១៧ ដើម្បីគាំទ្រដល់ការងារចារកម្មជាតិរបស់រដ្ឋបាលលោកស៊ី ជីនពីង៕
Post a Comment