បេក្ខជនសរុប ៦,៣៩៩នាក់ មកប្រឡងជ្រើសរើសនាយទាហានជំនាន់ថ្មី ក្នុងនោះមានបេក្ខនារី​ចំនួន ២,៩៩៨នាក់ ចំនួន៤មណ្ឌល

ភ្នំពេញ៖ នៅព្រឹកថ្ងៃទី៥ ខែមីនា ឆ្នាំ២០២៣នេះ ក្រសួងការពារជាតិ បានបើក​ស​ម័​យប្រឡងជ្រើសរើសនាយទាហានជំនាន់ថ្មី នៃកងយោធពលខេមរភូមិន្ទ ឆ្នាំ២០២៣។ ការប្រលងនេះមានបេក្ខជនសរុប ៦,៣៩៩នាក់ ក្នុងនោះមានបេក្ខនារី​ចំនួន ២,៩៩៨នាក់ បានចូលរួមប្រឡងប្រជែងនៅតាមមណ្ឌលចំនួន៤ ក្នុងរាជធានីភ្នំពេញ។

បេក្ខជននឹងចូលរួមប្រឡងប្រជែងចំនួន៤វគ្គរួមមានទី១៖ វគ្គនាយទាហាន​សកម្ម​ជំនាន់​ទី២៥, ទី២៖ វគ្គនាយទាហានទ័ពជើងគោកជំនាន់ទី១៣, ទី៣៖ វគ្គនាយ​ទាហាន​បន្តវេន​ជំនាន់ទី១៤ និងទី៤៖ វគ្គនាយទាហានជំនាញបច្ចេកទេសយោធា។

ការប្រលងនេះ នឹងត្រូវប្រលងលើវិញ្ញាសាកាយសម្បទា ចំណេះដឹងទូទៅ និងភាសា​អង់​គ្លេស។ ការប្រលងឆ្នាំនេះ គណៈកម្មការបានកំណត់យកនាយ​ទាហាន​សកម្មជំនាន់ទី២៥ ចំនួន ១០០នាក់, នាយទាហានទ័ពជើងគោកជំនាន់ទី១៣ ចំនួន ១០០នាក់, នាយទាហានបន្តវេនជំនាន់ទី១៤ ចំនួន១៥០នាក់, នាយទាហាន​ជំនាញបច្ចេកទេសយោធាចំនួន ៣០នាក់។

លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពល​ខេមរភូមិន្ទ និងជាមេបញ្ជាការកងទ័ពជើងគោក បានក្រើនរំលឹកបេក្ខជន បេក្ខនារី​ប្រលង​​​​ចូលទាហាន ត្រូវប្រើប្រាស់ និងជឿជាក់លើសមត្ថភាពរបស់ខ្លួន មិនត្រូវ​រំពឹង​លើការអន្តរាគមន៍ ឬអាងឪពុកម្តាយនោះឡើយ។

លោកឧត្តមសេនីយ៍ឯក ហ៊ុន ម៉ាណែត បានគូសរំលេចបែបនេះ ក្នុងឱកាសចុះពិនិត្យ និងកាត់វិញ្ញសាប្រលងជ្រើសរើសនាយទាហានជំនាន់ថ្មី ឆ្នាំ២០២៣ នាព្រឹកថ្ងៃអាទិត្យ ទី០៥ ខែមីនា ឆ្នាំ២០២៣នេះ។

ក្នុងកិច្ចសំណេះសំណាលជាមួយបេក្ខជន បេក្ខនារី ដែលបានដាក់ពាក្យប្រកួតប្រជែង លោក ហ៊ុន ម៉ាណែត បានរំលឹកពីលក្ខខណ្ឌ ភាពសុក្រឹតត្រឹមត្រូវ និងតម្លាភាព​លើការ​ប្រលង។ លោក ក៏បានណែនាំឱ្យបេក្ខជន និងបេក្ខនារីទាំងអស់ប្រើប្រាស់សមត្ថភាព និងជឿជាក់លើសមត្ថភាពចំណេះដឹងរបស់ខ្លួន ដោយមិនត្រូវរំពឹងលើកិច្ចអន្តរាគមន៍​ណា​មួយនោះឡើយ។

លោកឧត្តមសេនីយ៍ឯក ហ៊ុន ម៉ាណែត បានគូសបញ្ជាក់ដូច្នេះ «ត្រូវជឿទុកចិត្តលើ​ខ្លួន​ឯង កុំទុកចិត្ត កុំពឹងផ្អែកលើអ្នកដទៃ កុំពឹងអ្នកជិតខាងយើងចែករំលែក កុំពឹងលើការយកប្រ៊ីយ៉ុងចូល។ កុំពឹងលើអ្នកដទៃ ឪពុកម្តាយ អ៊ុំពូមីង បងប្អូនទៅអន្តរាគមន៍ កុំពឹងលើថវិកាទៅសូកគេ ទុកចិត្តលើខ្លួនឯងខ្លះទៅ»។

លោកបន្តថា «រៀនទុកចិត្តលើសមត្ថភាពខ្លួនឯង។ ពេលប្អូនជាប់ ជាប់ដោយមោទន​ភាព បើប្អូនអត់ជាប់ទេ ប្អូនបានអស់ចិត្តថា ប្អូនបានខិតខំអស់ហើយ»។

លោកឧត្តមសេនីយ៍ឯក ហ៊ុន ម៉ាណែត ក៏បានផ្តាំផ្ញើឱ្យបេក្ខជនទាំងអស់ ប្រឹងប្រែងផ្ចិតផ្ចង់ឆ្លើយឱ្យ​បាន​ត្រឹម​ត្រូវលើវិញ្ញាសា ដែលបានដាក់ជូន។