ថៃ៣នាក់កាប់ចិន២នាក់លើទឹកដីខ្មែរ ត្រូវបានបញ្ជូនទៅតុលាការ
ខេត្តបន្ទាយមានជ័យ៖ កម្លាំងមូលដ្ឋានកងរាជអាវុធហត្ថក្រុងប៉ោយប៉ែតនៅ ព្រឹកថ្ងៃទី២២ ខែមីនា ឆ្នាំ២០២៣នេះ បានបញ្ជូនខ្លួនជនជាតិថៃចំនួន៣នាក់ទៅសាលាដំបូងខេត្ត ពាក់ព័ន្ធករណីហិង្សាដោយចេតនា កាប់ទៅលើជនជាតិចិន២នាក់ បណ្តាលឱ្យរងរបួសយ៉ាងដំណំ កាលពីថ្ងៃទី២០ ខែមីនា ឆ្នាំ២០២៣ កន្លងទៅ ។
![](https://sbm.news/api/files/images/sbm-aPM2ntIjZKpx8wF9Kds8s.jpg)
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានឱ្យដឹងថា ជនសង្ស័យជនជាតិថៃទាំង៣នាក់ ដែលកម្លាំងជំនាញបានធ្វើការបញ្ជូនខ្លួនទៅសាលាដំបូងខេត្ត នៅព្រឹកមិញនេះរួមមាន៖ ទី១.ឈ្មោះ សូរ៉ាប្រាជ្ញ គិរីពង្ស Soraprach Kiryapong ,ទី២.ឈ្មោះ ស៊ុប៉ាឆ័យ សិទ្ធីមុតSupphachai Setteemut និងទី៣.ឈ្មោះ មុនសាក់ អៃយ៉ូ MONSAK AIMYOO ទាំងបីនាក់ ស្នាក់នៅបណ្តោះអាសន្ន ភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
![លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត](https://sbm.news/api/files/images/sbm-kVxY0YQ8Q4nZ3IfYVB8S6.png)
គួរបញ្ជាក់ថា តាមរយៈលោកវរសេនីយ៍ត្រី ការឃាត់ខ្លួនជនសង្ស័យជាជនជាតិថៃទាំ៣នាក់នេះ ធ្វើឡើងបន្ទាប់ពីទទួលបានពាក្យបណ្តឹងពីជនរងគ្រោះជនជាតិចិន លើករណីហិង្សាដោយចេតនា ប្រព្រឹត្តកាលពីវេលាម៉ោង១១:៣០នាទី ថ្ងៃទី២០ ខែមីនា ឆ្នាំ២០២៣ ចំណុចមុខវត្តផ្សារកណ្តាល ស្ថិតនៅភូមិសាស្ត្រដែលជនសង្ស័យស្នាក់នៅ។ ដោយក្រុមជនសង្ស័យទាំងនោះ បានធ្វើសកម្មភាពយកកាំបិតប៉័ងតោ កាប់ទៅលើជនរងគ្រោះជាជនជាតិចិន ចំនួនពីរនាក់ ទី១.ឈ្មោះ ឈិន ឈុនវ៉ៃ CHEN CHUN WEI ភេទប្រុស អាយុ៣៤ឆ្នាំ និងទី២.ឈ្មោះ លីន ឈុនហ្វូ LIN CHUN FU ភេទប្រុស អាយុ៤៦ឆ្នាំ បណ្តាលឱ្យរងរបួសជាច្រើនកន្លែង។
![ឯកឧត្តម បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ](https://sbm.news/api/files/images/sbm-c7YkUP_o3XgKyjs8NOeFW.jpg)
ក្រោយឃាត់ខ្លួន និងសួរនាំរួច ជនសង្ស័យទាំង៣នាក់ បានសារភាពថា ពួកខ្លួនពិតជាបានធ្វើសកម្មភាពកាប់ទៅលើជនរងគ្រោះជាជនជាតិចិនពិតប្រាកដមែន។ ដោយផ្អែកលើចម្លើយសារភាព និងមានវត្ថុតាងជាក់ស្ដែងកម្លាំងមូលដ្ឋានកងរាជអាវុធហត្ថក្រុងបានកសាងសំណុំរឿងបញ្ជូនជនសង្ស័យមកកាន់បញ្ជាការដ្ឋានកងរាជអាវុធហត្ថខេត្តចាត់ការបន្តតាមនីតិវិធី៕ រាយការណ៍ដោយ៖ លោក ឈុន មករា
![ជនរងគ្រោះ ជនជាតិចិន](https://sbm.news/api/files/images/sbm-GpRaNOju8s-4PO9E-8q9a.jpg)
![](https://sbm.news/api/files/images/sbm-yVaNmVb_C2bMoXkkygG1o.jpg)
Post a Comment