ផ្ទុះប្រតិកម្មសុំដកលោកនាយកវិទ្យាល័យ រឿងរៃអង្គាសប្រាក់ពីសិស្សម្នាក់១០ដុល្លារ
ខេត្តស្វាយរៀង ៖ ផ្ទុះការតវ៉ាយ៉ាងខ្លាំងពីសំណាក់លោកគ្រូ អ្នកគ្រូ និងអាណាព្យាបាលរបស់សិស្ស សុំឲ្យក្រសួងអប់រំ យុវជន និងកីឡា ដកលោក ចាន់ គឹមសែន នាយកវិទ្យាល័យ ហ៊ុនសែន ប្រសូតិ ចេញពីមុខតំណែង។ ក្រោយផ្ទុះរឿងអាស្រូវនៅវិទ្យាល័យហ៊ុនសែនប្រសូតិ ដោយចោទប្រកាន់លោក ចាន់ គឹមសាន នាយកវិទ្យាល័យ រឿងរៃអង្គាសប្រាក់សិស្សក្នុងម្នាក់ៗ១០ដុល្លារ ដើម្បីធ្វើសួនច្បារ ធ្វើឲ្យមានការប្រតិកម្មពីអាណាព្យាបាលសិស្ស និងលោកគ្រូ អ្នកគ្រូ ហើយស្នើឲ្យសុំអាជ្ញាធរ និងក្រសួងអប់រំ ជួយអន្តរាគមន៍ដកហូតមុខតំណែងលោកនាយកវិទ្យាល័យ ហ៊ុន សែន ប្រសូតិនេះផង។
ហើយនៅព្រឹកថ្ងៃទី១៥ ខែមីនា ឆ្នាំ២០២៣ លោកប្រធានមន្ទីរអប់រំ យុវជន និងកីឡាខេត្តស្វាយរៀង បានចាត់ឱ្យមន្ត្រីក្រុមការងារ មន្ទីរអប់រំ ចុះដោះស្រាយ ក៏ប៉ុន្តែលទ្ធផល គឺមិនឯកភាពពីលោកគ្រូ អ្នកគ្រូ ធ្វើឲ្យកាន់តែមានការសន្ទុះតវ៉ាជាខ្លាំង។ លុះមកដល់ថ្ងៃទី១៦ ខែមីនា ឆ្នាំ២០២៣នេះ លោកគ្រូ អ្នកគ្រូ ចំនួន៥៤នាក់ ក្នុងចំណោម៩៨នាក់ បានធ្វើលិខិតផ្តិតមេដៃ សុំដកលោក ចាន់ គឹមសែន នាយកវិទ្យាល័យ ហ៊ុន សែន ប្រសូតិ ចេញពីមុខតំណែងឲ្យខាងតែបាន។
យោងតាមហ្វេសប៊ុកលោកគ្រូ អា៑ម សំអ៊ីម ផ្នែកជីវៈវិទ្យា ជាគ្រូបង្រៀននៅវិទ្យាល័យ ហ៊ុន សែន ប្រសូតិ ស្រុកស្វាយទាប ខេត្តស្វាយរៀង បានទម្លាយរឿងអាស្រូវដ៏រស៊ើបដែលមិនអាចទទួលយកបានពីមាតាបិតា និងអាណាព្យាបាលសិស្ស ដែលលោកនាយកវិទ្យាល័យប្រសូតិ រៃអង្គាសប្រាក់ចំនួន១០ដុល្លារពីសិស្ស ដើម្បីធ្វើសួនច្បារ។
លោកគ្រូបានលើកឡើងថា សម្រាប់វិទ្យាល័យហ៊ុនសែនប្រសូតិ ថវិកាដែលបានមកពីដេញថ្លៃផ្ញើកង់ម៉ូតូចំនួន៦០លានរៀល និងថ្លៃតូបលក់ដូរចំនួន៧លានរៀលទៀតក្នុង១ឆ្នាំ ដូច្នេះ១ឆ្នាំទទួលបានចំនួន៦៧លានរៀល ដើម្បីយកមកអភិវឌ្ឍន៍សាលារៀន ចុះហេតុអ្វីនៅពេលនេះលោកនាយកវិទ្យាល័យ ហ៊ុន សែនប្រសូតិ គឺលោកចាន់ គឹមសែន នេះ មករៃលុយរបស់សិស្សចំនួន១០ដុល្លារ នៅអគារ D ដែលយកថវិកានេះថា ធ្វើសួនច្បារខាងមុខអគារបន្ថែម?។
លោកគ្រូបានបន្តថា ក្នុងនាមជាគ្រូបង្រៀនម្នាក់ក្នុងវិទ្យាល័យនេះ ហើយក៏ក្នុងនាមជាអាណាព្យាបាលដែលមានកូនចំនួន៣នាក់រៀននៅក្នុងសាលានេះដែរ សូមធ្វើការជំទាស់ចំពោះការរៃអង្គាសថវិកាពីសិស្សនេះ ព្រោះសាលាមានប្រាក់សម្រាប់អភិវឌ្ឍន៍រួចហើយ គឺប្រាក់ផ្ញើកង់ម៉ូតូនិងប្រាក់ថ្លៃតូបជាប្រចាំឆ្នាំប្រមាណ៦៧លានរៀល។
លោកបានបន្តថា ចំពោះករណីរៃអង្គាសប្រាក់ពីសិស្សនេះ គឺទើបតែអនុវត្តនៅក្នុងអគារ D ចំណែកអគារផ្សេងៗទៀតមិនទាន់ធ្វើនោះទេ។ បើតាមលោកគ្រូ អ៊ីម បានបញ្ជាក់ថា ករណីរៃប្រាក់ពីសិស្សនេះ បើអនុវត្តនូវអគារ D បានជោគជ័យ និងបន្តទៅធ្វើអគារផ្សេងៗទៀតជាក់ជាមិនខានឡើយ។ ហើយករណីនេះ ជាករណីលើកទី១ផងដែរ សម្រាប់ការរៃអង្គាសពីសិស្សចំនួន១០ដុល្លារ ដោយរយៈកាលកន្លងមក លោកនាយកបានធ្វើបុណ្យផ្កាសាមគ្គី ដើម្បីប្រមូលបច្ច័យកសាងសាលាដែរ ហើយក្នុងនោះក៏បានដាក់កំហិតដល់សិស្សម្នាក់ចំនួន២ម៉ឺនរៀល និងលោកគ្រូ អ្នកគ្រូចំនួន៥ម៉ឺនរៀល និងមានការចូលរួមពីសប្បុរជនជាច្រើនទៀត ដើម្បីយកទៅធ្វើសួនច្បារ តែសួនច្បារទាំងនោះ មានដូចជា រូបសំណាកសុទ្ធសឹងជាចូលរួមថវិការបស់លោកគ្រូ អ្នកគ្រូ ក្នុងការកសាងផងដែរ។
លោកគ្រូបានបញ្ជាក់ថា រាល់ការប្រជុំ ក៏ដូចជាការដឹកនាំរបស់លោកនាយកសាលា ចាន់ គឹមសែន គឺតែងតែនិយាយពាក្យអសុរោះមិនសាកសមជាគ្រូបង្រៀន ហើយលោកគ្រូ អ្នកគ្រូមិនអាចនិយាយអំពីបញ្ហាកង្វល់របស់ខ្លួននៅក្នុងអង្គប្រជុំបានទេ អនុម័តដែលខ្លួនឯងជាដើម។ហើយរាល់ការអភិវឌ្ឍន៍នៅក្នុងសាលាវិទ្យាល័យហ៊ុន សែនប្រសូតិ លោកគ្រូ អ្នកគ្រូតែងតែចូលរួមជាថវិកាក្នុងការកសាងហេដ្ឋារចនាសម្ព័ន្ធក្នុងសាលាជាបន្តបន្ទាប់។
ក្នុងនាមជាអាណាព្យាបាល ក៏ដូចជា គ្រូបង្រៀនម្នាក់ ក្នុងវិទ្យាល័យហ៊ុនសែនប្រសូតិ លោកគ្រូ អ៊ាង សំអ៊ីម សូមសំណូមពរលោកអភិបាលខេត្តស្វាយរៀង និងក្រសួងអប់រំ យុវជន និងកីឡា សូមមេត្តាមកពិនិត្យមើលការដឹកនាំរបស់លោក ចាន់ គឹមសែន ជានាយកវិទ្យាល័យហ៊ុនសែនប្រសូតិ ដែលមានការរៃអអង្គាសប្រាក់ពីសិស្សចំនួន១០ដុល្លារនៅអគារD និងការដឹកនាំមិនស៊ីសង្វាក់ជាមួយលោកគ្រូ អ្នកគ្រូ ដែលបង្រៀននៅក្នុងសាលានេះផង ដើម្បីពង្រឹងការវិជ្ជាជីវៈគ្រូបង្រៀន ក៏ដូចជាវិស័យអប់រំឲ្យរឹងមាំ ជាពិសេសគឺធ្វើយ៉ាងណា កុំឱ្យមានការរៃអង្គាសប្រាក់ពីសិស្សតទៅទៀត។
ពាក់ព័ន្ធនឹងករណីខាងលើនេះ លោក ចាន់ គឹមសែន នាយកវិទ្យាល័យហ៊ុន សែនប្រសូតិ បានបញ្ជាក់ប្រាប់កោះសន្តិភាពថា ចំពោះករណីរិះគន់ពាក់ព័ន្ធនឹងការរៃអង្គាសលុយសិស្សចំនួន១០ដុល្លារ គឺមិនពិតទេ។ លោកនឹងជូនការបកស្រាយរបស់អាណាព្យាបាលសិស្ស របស់គ្រូបន្ទុកថ្នាក់ របស់គណៈកម្មការអភិវឌ្ឍថ្នាក់រៀន និងគណៈកម្មការគ្រប់គ្រងសាលារៀន នោះនឹងបានជ្រាបទាំងអស់គ្នា៕
Post a Comment