រដ្ឋមន្ត្រីព័ត៌មាន ៖ ការគិតខ្លីរបស់លោក លន់ នល់ បាននាំឱ្យឈាមខ្មែរក្លាយជាស្ទឹង

ភ្នំពេញ៖ ថ្ងៃទី១៨ ខែមីនា នេះគឺ៥៣ឆ្នាំ ដែលសេនាប្រមុខលន់ នល់ ធ្វើរដ្ឋប្រហារទម្លាក់សម្ដេចព្រះនរោត្តម សីហនុ មុនទាហាន​បាន​ឡោមព័ទ្ធរដ្ឋសភាជិត និងហាមមានការនិយាយការពារសម្ដេចប្រមុខរដ្ឋ ខណៈរដ្ឋមន្ត្រីព័ត៌មាន ឯកឧត្តម ខៀវ កាញារីទ្ធ លើកឡើង​ថា​ ដោយ​សារការគិតមិនវែងឆ្ងាយរបស់លោក លន់ នល់ កាលនោះហើយបានទាញឱ្យខ្មែរស្លាប់ រាប់លាននាក់ និងធ្វើឱ្យឈាមខ្មែរក្លា​យជា​ស្ទឹង។

ឯកឧត្តម ខៀវ កាញារីទ្ធ បានសរសេរនៅលើគណនីហ្វេសបុករបស់លោកនៅថ្ងៃទី១៨ ខែមីនា ឆ្នាំ២០២៣នេះ​ ថា «នៅ​រសៀ​ល​នោះ លោកកំពុងនិយាយគ្នាលេងជាមួយលោក គូ រុន នៅម្ដុំទួលគោក ហើយមានគេ​មកប្រា​ប់​ថា គេ​ទម្លាក់សម្ដេច​ព្រះ​ន​រោ​ត្តម សីហនុ ហើយ ដោយសារលក់ដីឱ្យយៀកកុង និងពុករលួយ។ រហូតដល់ព្រឹកថ្ងៃទី១៧ ខែមីនា ទើបប្រព័ន្ធផ្ស​ព្វផ្សាយ​វិទ្យុជាតិបានប្រកាសពីរដ្ឋប្រហារនេះ។ មួយឆ្នាំក្រោយក្នុងអាយុ១៨ឆ្នាំដែល​លោកបានចូល​ធ្វើជាលេខាផ្ទាល់​ប្រធានក្រុម​ប្រឹក្សារាជបល្ល័ង្ក លោក អ៊ុង ស៊ីម ទើបលោកដឹងថាការធ្វើរដ្ឋប្រហារពេលនោះ គឺស្ថិតក្រោមការគំរាមកំហែ​ងពីទា​ហានលោក លន់ នល់ ដោយផ្ទាល់»។

ឯកឧត្តមបន្តថា៖ «នៅឆ្នាំ១៩៧១ ពេលធ្វើជាលេខាផ្ទាល់លោក អ៊ុង ស៊ីម ប្រធានក្រុមប្រឹក្សាព្រះរាជបល្ល័ង្ក (បន្ទាប់មកក្លាយ​ជាព្រឹទ្ធសភាសាធារណរដ្ឋ) ទើបខ្ញុំដឹងការនៅថ្ងៃពិភាក្សានោះ ទាហាន​បានព័ទ្ធរដ្ឋសភាជុំជិតរួចហើយ​ៗហាមមានការនិ​យាយ​កា​រ​ពារព្រះប្រមុខរដ្ឋ។ ថ្ងៃនោះជាថ្ងៃដែលឈាមខ្មែរក្លាយជាស្ទឹង ជា​ទន្លេព្រោះតែអ្នកនយោបាយខ្មែរមើល​ត្រឹមតែចុង​ច្រមុះខ្លួ​ន មិនបានមើលការវិវត្តនយោបាយនៅក្រៅបន្ដិចណាសោះឡើយ»។

គួរឱ្យដឹងផងដែរថា រដ្ឋប្រហារថ្ងៃទី១៨ ខែមីនា ដោយសេនាប្រមុខ លន់ នល់ បានទាញសង្គ្រាមអាម៉េរិក និងវៀតណាម​នៅ​ព្រំ​ដែន ឱ្យចូលក្នុងផ្ទៃប្រទេសកម្ពុជាពេញទី ដោយសារតែនយោបាយសាធារណរដ្ឋខ្មែរមានជំហរទៅរកអាម៉េរិកជួយវៀតណាមខាងត្បូងទប់ទល់នឹងវៀតណាមខាងជើង៕​