ខ្មាន់កាំភ្លើង បានបន្សល់ទុកក្រដាសតូចមួយ គំរាម Messi ក្រោយការបាញ់ប្រហារមួយនៅផ្សារទំនើបរបស់គ្រួសារប្រពន្ធខ្លួន
បាល់ទាត់៖ អ្នកគាំទ្រកីឡាករ លីអូណែល ម៉េស៊ី Lionel Messi នៅជុំវិញពិភពលោក បានបង្ហាញក្ដីព្រួយបារម្ភយ៉ាងខ្លាំង បន្ទាប់ពីមានការបាញ់ប្រហារមួយនៅផ្សារទំនើបដែលជាកម្មសិទ្ធិរបស់គ្រួសារប្រពន្ធកីឡាករ Messi គឺលោកស្រី អង់តូនែឡា រ៉ូសកូហ្សូ Antonela Roccuzzo ក្នុងប្រទេសអាហ្សង់ទីន និងបានបន្សល់ទុកនូវក្រដាសតូចមួយផ្ទាំង ដែលបង្ហាញពីការគំរាមកំហែងដល់កីឡាករ Messi ផងដែរ...។
![](https://sbm.news/api/files/images/sbm-m6RD1SUlXmqKnHHiSCU3k.jpg)
ជុំវិញបញ្ហាខាងលើនេះ ស្ថានីយទូរទស្សន៍ក្នុងស្រុកមួយបានអះអាងថា ក្រុមឧក្រិដ្ឋជនទាំងនោះ អាចនឹងមានបំណងចង់ចាប់ជំរិតទារប្រាក់ពីកីឡាករ Lionel Messi។ វីដេអូរសារព័ត៌មាន CCTV បង្ហាញថា៖ បុរសពីរនាក់ជាខ្មាន់កាំភ្លើង បានជិះម៉ូតូសំដៅទៅកន្លែងកើតហេតុ រួចក៏បាញ់រះជាច្រើនគ្រាប់នៅទ្វារដែកហាង ប្រហែលនៅម៉ោងពីរទៀបភ្លឺថ្ងៃព្រហស្បតិ៍។ ខ្មាន់កាំភ្លើង បានបើកការបាញ់ប្រហារយ៉ាងហោចណាស់កន្លះម៉ោង បន្ទាប់មកក៏បានបន្សល់ទុកនូវក្រដាសតូចមួយផ្ទាំង នៅចំណុចកើតហេតុខាងលើនោះ។ នៅក្នុងក្រដាសតូចមួយផ្ទាំងនោះ បានសរសេរថា៖ «Messi យើងកំពុងរង់ចាំអ្នក! ចាវគីន (Javkin) គឺជាអ្នកជួញដូរគ្រឿងញៀន ដូច្នេះគាត់នឹងមិនមើលថែអ្នកទេ»។
![](https://sbm.news/api/files/images/sbm-hZIIi7Za59ELGc9J9Fgwr.jpg)
លោក ប៉ាប្លូ ចាវគីន Pablo Javkin អភិបាលក្រុង រ៉ូសារីអូ Rosario ជាកន្លែងដែលត្រូវខ្មាន់កាំភ្លើងវាយប្រហារ និងទីកន្លែងកំណើតរបស់កីឡាករ Lionel Messi ផងដែរ។ ផ្សារទំនើបស៊ុភើរ មើកាដូ យូនីកូ Super mercado Unico ជាកម្មសិទ្ធិរបស់គ្រួសារប្រពន្ធកីឡាករ Messi គឺលោកស្រី Antonela Roccuzzo ខណៈដែលសាខានេះ គ្រប់គ្រងដោយប្អូនជីដូនមួយរបស់ Roccuzzo ។
គួរបញ្ជាក់ថា Lionel Messi ទើបតែបានឈ្នះពានរង្វាន់កីទ្បាករល្អជាងគេប្រចាំឆ្នាំ២០២២ របស់ FIFA ជាលើកទីប្រាំពីរ ក្នុងប្រវត្តិសាស្ត្របាល់ទាត់ពិភពលោក។ Messi ក៏ជាឥស្សរជនម្នាក់ ដែលមានការគាំទ្រច្រើននៅក្នុងប្រទេស និងក្រៅប្រទេស ជាពិសេស បន្ទាប់ពីជួយឱ្យក្រុមជម្រើសជាតិអាហ្សង់ទីនទទួលបានជើងឯក World Cup ជាលើកទីបីក្នុងប្រវត្តិសាស្ត្របាល់ទាត់របស់ប្រទេសខ្លួនផងដែរ...៕
![](https://sbm.news/api/files/images/sbm-8Gm3LazS4BL_D4KSHmozv.jpg)
Post a Comment