ផ្ទះប្រជាពលរដ្ឋ ជាច្រើនខ្នង នៅតាមមាត់ទន្លេស្រុកស្អាង បានបាក់ស្រុត

ខេត្តកណ្តាល៖ សេចក្តីរាយការណ៍បឋមបានឱ្យដឹងនៅ​ថ្ងៃ​ទី​២៤ ខែមេសា ឆ្នាំ​២០២៣​នេះ​ថា ​ផ្ទះ​បងប្អូន​ប្រជាពលរដ្ឋ​ជា​ច្រើន​ខ្នង​ដែល​សង់​តាមបណ្តោយ​ដង​ទន្លេ ស្ថិត​នៅ​ភូមិ​ត្រពាំង​ឈូក ឃុំ​ព្រែក​គយ ស្រុក​ស្អាង (​មុខ​ផ្សារ​ស្អាង​) ខេត្តកណ្តាល បាន​បាក់​ស្រុតចូលទន្លេអស់ជាច្រើនខ្នង ។

ករណី​បាក់​ផ្ទះ​ប្រជាពលរដ្ឋ​ចូល​ទន្លេដែលបានបង្ក​ឱ្យ​មានការ​ភ្ញាក់ផ្អើល និង​ខូចខាត​ផ្ទះ​ប្រជាពលរដ្ឋ​អស់​ជា​ច្រើន​ខ្នងនោះ ​អាច​នឹងបន្ត​បាក់​បន្ថែមទៀត​ ​ធ្វើ​ឱ្យ​ប្រជាពលរដ្ឋមួយចំនួនបាននាំគ្នាប្រមូល​របស់របរ និង​ស្វែងរក​ទីតាំង​សុវត្ថិភាព​។ ពាក់ព័ន្ធករណី​គ្រោះ​ធម្មជាតិ​បាក់​ផ្ទះ​ប្រជាពលរដ្ឋ​ជាប់​ច្រាំង​ទន្លេ​ជាប់​គ្នា​ៗ​នេះ អាជ្ញាធរនៅ​មិន​ទាន់​អាច​សន្និដ្ឋាន​ថា ផ្ទះ​ប៉ុន្មាន​ខ្នង​បាន​បាក់​ស្រុត និង​អំពី​ទំហំ​នៃ​ការ​ខូចខាត​បាន​នៅឡើយ​ទេ ខណៈអាជ្ញាធរដែនដីកំពុងព្យាយាមជួយសង្គ្រោះផ្ទះប្រជាពលរដ្ឋផ្សេងទៀតដែលដីមិនទាន់បាក់ស្រុតចូលទន្លេនៅឡើយ។ ប៉ុន្តែយ៉ាងណា អាជ្ញាធរមូលដ្ឋាន បានចុះស្រង់ធ្វើកំណត់ហេតុពីម្ចាស់ផ្ទះ ដើម្បីឱ្យដឹងថា ផលប៉ះពាល់ទាំងនោះមានទំហំកម្រិតណាឱ្យពិតប្រាកដ។

ក្រោយមានហេតុការណ៍នេះ អភិបាលខេត្តកណ្ដាលឯកឧត្តម គង់ សោភ័ណ្ឌ បានចេញបទបញ្ជាភ្លាមៗដល់អាជ្ញាមូលដ្ឋាន និងកង​ក​​ម្លាំងសមត្ថកិច្ចចេញអន្តាគមន៍ជួយសង្រ្គោះពលរដ្ឋបន្ទាន់ផងដែរ។ មកទល់នឹងម៉ោងនេះ ពុំទាន់មានសេចក្ដីរាយ​ការ​ណ៍លម្អិតពី​ករណីគ្រោះថ្នាក់ដល់អាយុជីវិតមនុស្សនៅឡើយទេ ហើយអាជ្ញាធរក៏កំពុង​ញាប់ដៃញាប់​ជើងជួយ​ស​ង្រ្គោះ​​ប្រជាពល​រដ្ឋផងដែរ។

គួរជម្រាបថា កន្លែងបាក់ស្រុតខាងលើ ជាតំបន់ខ្សែទឹកកោងចំមុខទឹកហូរបុកមកជារៀងរាល់ថ្ងៃ ខណៈកាលពីប៉ុន្មានឆ្នាំមុន មានករណីដាច់សាឡុងបូមខ្សាច់នៅទីនេះ ហើយពលរដ្ឋតវ៉ាជាញឹកញាប់ទម្រាំតែគេដកចេញ ហើយករណីបាក់ស្រុតផ្ទះក៏នៅបន្តលងបន្លាចពលរដ្ឋមកដល់បច្ចុប្បន្ន៕