អធិការរងស្រុកបាភ្នំ ត្រូវបញ្ជូនទៅតុលាការ ក្រោយបង្កឲ្យពលរដ្ឋម្នាក់ត្រូវ១គ្រាប់កាំភ្លើង
លោក ស៊ាង ប៊ុនណាល់ អធិការរងវ័យ២៦ឆ្នាំ នៅស្រុកបាភ្នំ ខេត្តព្រៃវែង ត្រូវឃាត់ខ្លួន ក្រោយពលរដ្ឋម្នាក់ ត្រូវ១គ្រាប់កាំភ្លើងរបស់លោក ក្នុងអំឡុងលោក ដឹកនាំកម្លាំងចុះទៅបង្ក្រាបទីតាំង១កន្លែង ដែលលួចលេងល្បែងជល់មាន់ កាលពីថ្ងៃទី១៥ ខែមេសា ឆ្នាំ២០២៣ គឺចំថ្ងៃទី២ នៃពិធីបុណ្យចូលឆ្នាំខ្មែរ។
លោក ចាន់ វណ្ណៈ ព្រះរាជអាជ្ញារងនៃអយ្យការអមតុលាការខេត្តព្រៃវែង ប្រាប់សារព័ត៌មានថ្មីៗ នៅថ្ងៃទី១៩ ខែមេសានេះថា លោកអធិការរង ស៊ាង ប៊ុនណាល់ ត្រូវបានបញ្ជូនទៅស្ថាប័នអយ្យការហើយ។ លោក បញ្ជាក់យ៉ាងខ្លី ស្ថាប័នអយ្យការ កំពុងពិនិត្យនិងចាត់ការតាមនីតិវិធីលើសំណុំរឿងនេះ។ យ៉ាងណា លោកព្រះរាជអាជ្ញារង មិនទាន់ទទួលបានព័ត៌មាននៅឡើយទេថា លោកអធិការរងជាជនសង្ស័យរូបនេះ ត្រូវចោទពីបទអ្វី។
សារព័ត៌មាននានា បានស្រង់សម្តីរបស់លោក ឈឿន ប៊ុនឆន ស្នងការខេត្តព្រៃវែងថា លោក នេត សាវឿត អគ្គស្នងការនគរបាលជាតិ បានបញ្ជាឲ្យផ្អាកតួនារីរបស់លោក ស៊ាង ប៊ុនណាល់ ហើយត្រូវបញ្ជូនទៅតុលាការ។ ជាមួយគ្នានេះ លោក ប្រាក់ ចាន់ថេត ស្នងការរងនគរបាលខេត្តព្រៃវែង បានសរសេររបាយការណ៍ពីករណីផ្ទុះអាវុធនៅកន្លែងជល់មាន់នេះ ជូនទៅលោក នេត សាវឿន។
«គ្រាន់តែឃើញកម្លាំងសមត្ថកិច្ចភ្លាម ក្រុមអ្នកលេងល្បែងភ្នាល់បញ្ជល់មាន់ ក៏នាំគ្នារត់ប្រសេចប្រសាច។ ខណៈនោះ លោកអធិការរង ស៊ាង ប៊ុនណាល់ ក៏បានស្រែក និងដកអាវុធខ្លីមកគំរាមឲ្យពួកគេឈប់ តែពួកគេមិនឈប់ទេ។ បន្ទាប់មកលោក ស៊ាង ប៊ុនណាល់ ក៏បានទៅចាប់បុរសម្នាក់ឈ្មោះសាន វិចិ្ឆកា អាយុ៣៦ឆ្នាំ ដែលកំពុងឡើងជិះម៉ូតូ ដើម្បីរត់គេចខ្លួន ក៏មានការប្រវាយប្រតប់គ្នាធ្វើឲ្យលោក ស៊ាង ប៊ុនណាល់ និងបុរសឈ្មោះ សាន វិចិ្ឆកា ព្រមទាំងម៉ូតូនោះដួលបណ្ដាលឲ្យរៀលកៃកាំភ្លើងផ្ទុះ១គ្រាប់ ត្រូវចង្កេះឈ្មោះសាន វិចិ្ឆកា តែម្ដង»។ នេះការរៀបរាប់របស់លោក ប្រាក់ ចាន់ថេត ទៅកាន់លោក នេត សាវឿន តាមរយៈរបាយការណ៍។ ខ្លឹមសារនៃរបាយការណ៍នេះ ត្រូវបានស្រង់យកទៅផ្សាយដោយកាសែតភ្នំពេញប៉ុស្តិ៍។
ក្រោយត្រូវ១គ្រាប់ត្រង់ចង្កេះ ជនរងគ្រោះ ត្រូវបានបញ្ជូនទៅមន្ទីរពេទ្យជោរៃ រាជធានីភ្នំពេញ ហើយបន្ទាប់មក ត្រូវបានបញ្ជូនបន្តទៅមន្ទីរពេទ្យនៅប្រទេសវៀតណាម៕
Post a Comment