នៅដើមឆ្នាំ២០២៣ នេះ មានលោកស្នងការ ចំនួន ៤រូប កំពុងល្បីខ្លាំងនៅលើបណ្ដាញសង្គម

នៅក្នុងចំណោមស្នងការ រាជធានីខេត្ត ទាំង២៥ខេត្ត-ក្រុង មានស្នងការ ចំនួន ៤រូប ដែលកំពុងមានប្រជាប្រិយភាពខ្លាំងនៅលើបណ្ដាញសង្គម និងបណ្តាសារព័ត៌មាន នានា តេីមានស្នងការខេត្តណាខ្លះ? តោះមកតាមដានទាំងអស់គ្នា ជាមួយ Read News ដូចតទៅ ÷

១-ឧត្តមសេនីយ៍ទោ ជួន ណារិន្ទ ស្នងការនគរបាល ខេត្តព្រះសីហនុ សកម្មភាពការងារ របស់លោកស្នងការរូបនេះ ត្រូវបានផ្សព្វផ្សាយយ៉ាងទូលំទូលាយ ចាប់តាំងពីលោក ត្រូវបានឡើងជាស្នងការ កាលពីខែមេសា ឆ្នាំ២០១៥ បេីគិតមកដល់ពេលបច្ចុប្បន្នមានរយៈពេល ៨ឆ្នាំហេីយ ។ មុនឡើង ជាស្នងការខេត្តព្រះសីហនុ ឧត្តមសេនីយ៍ទោ ជួន ណារិន្ទ គឺជាស្នងការរង រាជធានីភ្នំពេញ ទទួលផែនព្រហ្មទណ្ឌ និងអតីតប្រធានការិយាល័យ ព្រហ្មទណ្ឌកម្រិតធ្ងន់រាជធានីភ្នំពេញ ដែលគេស្គាល់ថា ជាមន្រ្តីមួយរូប ដែលមានជំនាញខ្ពស់ លេីជំនាញ លើផ្នែកព្រហ្មទណ្ឌ និងធ្លាប់បានបញ្ចេញស្នាដៃ ជាច្រើន លេីការបង្ក្រាបបទល្មើសនានា ។ មកដល់ឆ្នាំពី២០២៣ ខណៈដែលខេត្តព្រះសីហនុ មានការអភិវឌ្ឍយ៉ាងឆាប់រហ័ស វត្តមាន ជនបរទេស ដែលភាគច្រើន ជាជនជាតិចិន បានបង្កររឿងឈឺក្បាលច្រើន ដែលធ្វើអោយលោកស្នងការ ហាក់មិនសូវមានពេលទំនេរឡើយ បេីធៀបនិងបណ្តាស្នងការ ផ្សេងៗទៀត ។

ឧត្តមសេនីយ៍ទោ ជួន ណារិន្ទ ស្នងការនគរបាល ខេត្តព្រះសីហនុ

២-ឧត្តមសេនីយ៍ទោ ឈឿន ប៊ុនឆន ស្នងការនគរបាល ខេត្តព្រៃវែង ឡើងកាន់ដំណែងជាស្នងការ កាលពីថ្ងៃទី១៣ ខែមីនា ឆ្នាំ២០២៣ លោកស្នងការរូបនេះតែងតែបង្ហាញស្នាដៃ លេចធ្លោ លើកិច្ចការ បង្គាប់បញ្ជា និងគ្រប់គ្រងបែបថ្មី ទៅលើស្នងការដ្ឋានខេត្ត រួមទាំងអធិការ ស្រុក-ក្រុង ទាំង១៣ នៃខេត្តព្រៃវែង ដោយដាក់ចេញ នូវបទបញ្ជា គោលនយោបាយ ភូមិឃុំមានសុវត្តិភាព ការបង្ក្រាបគ្រឿងញៀន និងក្មេងទំនេីង ។ អតីតប្រធាននាយកដ្ឋានវិទ្យុទាក់ទង និងអតីតជាអធិការស្រុកកោះធំ រូបនេះ ត្រូវបានពលរដ្ឋស្គាល់លោកច្បាស់ ចាប់តាំងពីលោក ដឹងនាំបង្ក្រាបបទល្មើសនេសាទខុសច្បាប់ ទ្រង់ទ្រាយធំ ដែលភាគច្រើនជាជនជាតិ វៀតណាម ។ ថ្ងៃដែលលោកចូលកាន់ជាស្នងការលេីកដំបូង លោកបានលើកឡើងថា " ត្រូវតែប្រឹង " គ្មានអ្វីក្រៅពី និយាយថាប្រឹង ។

ឧត្តមសេនីយ៍ទោ ឈឿន ប៊ុនឆន ស្នងការនគរបាល ខេត្តព្រៃវែង

៣-ឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ ល្បីខ្លាំង ជាស្នងការ ពោពេញទៅដោយ ភាពទន់ភ្លន់ ម៉ឺងម៉ាត់ សមត្ថភាពខ្ពស់ ទាំងចំណេះធ្វើ និងចំណេះដឹង លោកបាន រៀបរាប់យ៉ាងខ្បោះខ្បាយ នូវសំណុំរឿង កុមារី លួត លីហ្សា នៅក្រុងប៉ោយប៉ែត ថ្លែងក្នុងសន្និសិទសារព័ត៌មាន ដោយរៀបចំដោយអង្គភាពអ្នកនាំពាក្យ ។ ឧត្តមសេនីយ៍ទោ សិទ្ធិ ឡោះ ទទួលបានការកោតសរសើរ និងការគោរព ពីមជ្ឈដ្ឋានមហាជន គ្រប់ស្រទាប់វណ្ណ: ព្រោះតែការធ្វើការ អដ្ឋាធិប្បាយ មានភាពច្បាស់លាស់ មានអំណាស់ អំណាងត្រឹមត្រូវ កាយវិការពាក្យសំដីទន់ភ្លន់ តែម៉ឺងម៉ាត់ ប្រកបដោយចំណេះដឹង និងទំនួលខុសត្រូវលេីការងារ ។ ឧត្តមសេនីយ៍ទោ សិទ្ធិ ឡោះ បានឡើងកាន់ដំណែងជាស្នងការ កាលពីខែកញ្ញា ឆ្នាំ២០២០ ដែលគិតមកទល់ពេលនេះ ជិត ៣ឆ្នាំហេីយ មុនឡើងកាន់ជាស្នងការ លោកធ្លាប់ជាស្នងការរង និងធ្លាប់ជាមន្ត្រីអាវុធហត្ថ មួយរូប ។ លោកគឺជាស្នងការដំបូងគេ ដែលបានរៀបចំកម្មវិធីអាហារសាមគ្គី ជាមួយអ្នកសារព័ត៌មាន ក្នុង កម្មវិធីឆ្លងឆ្នាំ នូវស្នងការដ្ឋានខេត្តបន្ទាយមានជ័យ ។

ឧត្តមសេនីយ៍ទោ សិទ្ធិ ឡោះ ស្នងការនគរបាល ខេត្តបន្ទាយមានជ័យ

៤-ឧត្តមសេនីយ៍ទោ ឈាង ផាន់ណារ៉ា ស្នងការនគរបាល ខេត្តតាកែវ មិនដឹងជារឿងសំណាង ឬ ជារឿងស៊យ របស់លោកស្នងការ រូបនេះទេ ប៉ុន្តែបើធៀបទៅ នឹង លោកស្នងការទាំងបីខាងលើ អាចចាត់ទុកថាលោកស្នងការខេត្តតាកែវ ហាក់ល្បីល្បាញខ្លាំងជាងគេលើបណ្ដាញសង្គម នៅដើមឆ្នាំ ២០២៣ នេះ ប៉ុន្តែភាពល្បីនោះ គឺផ្ទុយពីលោកស្នងការទាំងបី ៣៦០ ដឺក្រេ តែម្ដង ។ អតីតស្នងការរងនគរបារាជធានីភ្នំពេញ រូបនេះ បានកាន់តំណែងជាស្នងការនគរបាលខេត្តតាកែវ កាលពីថ្ងៃទី ២៤ ខែវិច្ឆិកា ឆ្នាំ២០២១ ក្រោយការ កាន់តំណែងបាន ជាងមួយឆ្នាំ ស្រាប់តែលោកល្បីតែម្ដង គឺនៅក្នុងឱកាសធ្វើបទបង្ហាញ សន្និសិទសារព័ត៌មាន នៅទីស្ដីការគណៈរដ្ឋមន្ត្រី កាលពីថ្ងៃទី ២ ខែមីនា ឆ្នាំ២០២៣ ដោយ លោកឧត្តមសេនីយ៍ទោ បានប្រើពាក្យ" ស៊យ និង ចៃដន្យ " ទៅលើករណីគប់កញ្ចក់រថយន្តតាមបណ្ដោយផ្លូវជាតិ លេខ៣ ការលើកឡើងរបស់លោកស្នងការខេត្តតាកែវ រូបនេះ ត្រូវបានអ្នកលេងបណ្ដាញសង្គម ចែករំលែកនិងរិះគន់ដូចទឹកបាក់ទំនប់ ជាពិសេសក៏មានប្រតិកម្ម ពីក្រុមគ្រួសារជនរងគ្រោះផងដែរ។ ក្រៅពីការ រិះគន់ មហាជនក៏ បានដាក់រហស្សនាមលោកស្នងការថា "ពូស៊យ" ៕

ឧត្តមសេនីយ៍ទោ ឈាង ផាន់ណារ៉ា ស្នងការនគរបាល ខេត្តតាកែវ