ក្លាយជាជនសង្ស័យ ក្រោយព្រួតវាយ បុរសម្នាក់សង្ស័យជាចោរ បណ្តាលឱ្យស្លាប់នៅកណ្តាលវាលស្រែ

ខេត្តព្រៃវែង៖ ប្រជាពលរដ្ឋ៧នាក់បានក្លាយជាជនសង្ស័យ និងត្រូវបានសមត្ថកិច្ចបញ្ជូនទៅតុលាការ នាថ្ងៃទី៤ ខែមេសា ឆ្នាំ២០២៣នេះ ក្រោយពីសមត្ថកិច្ចស្រាវជ្រាវរកឃើញថា ពួកគេមានជាប់ពាក់ព័ន្ធនឹងករណីព្រួតវាយបុរសម្នាក់សង្ស័យជាចោរលួច បណ្តាលឱ្យស្លាប់នៅកណ្តាលវាលស្រែទាំងយប់។ ហេតុការណ៍នេះបានកើតឡើងនៅវេលាម៉ោង១២និង២០នាទី យប់រំលងអធ្រាត្រ ឈានចូលថ្ងៃទី៣០ ខែមីនា ឆ្នាំ២០២៣ ត្រង់ចំណុចវាលស្រែ ស្ថិតក្នុងភូមិតាមូង ឃុំថ្កូវ ស្រុកកំពង់ត្របែក ខេត្តព្រៃវែង។

ជនរងគ្រោះឈ្មោះ ឡុង នី ភេទប្រុស អាយុ ៦០ឆ្នាំ រស់នៅភូមិតាប្រុយ ឃុំព្រៃពោន ស្រុកកំពង់ត្របែក ខេត្តព្រៃវែង ។ ចំណែកជនសង្ស័យមានចំនួន ០៧នាក់ ទី១. ឈ្មោះ រិន ប្រិមប្រិយ (ហៅកី) ភេទប្រុស អាយុ ២៨ឆ្នាំ, ទី២. ឈ្មោះ មុំ ចិត្តា (ហៅចិត្ត) ភេទប្រុស អាយុ ២៨ឆ្នាំ, ទី៣. ឈ្មោះ ប្រាក់ ចំរើន (ហៅធុយ ) ភេទប្រុស អាយុ ២៣ឆ្នាំ, ទី៤. ឈ្មោះ គង់ វិវឌ្ឍន៍ (ហៅខ្លី) ភេទប្រុស អាយុ ២៧ឆ្នាំ, ទី៥. ឈ្មោះ គង់ សាម៉េត (ហៅម៉េន) ភេទប្រុស អាយុ ៣៧ឆ្នាំ, ទី៦. ឈ្មោះ អ៊ុន វ៉ា (ហៅស្វិត) ភេទប្រុស អាយុ ៥២ឆ្នាំ និងទី៧. ឈ្មោះ ផង់ ស៊ីណា ភេទប្រុស អាយុ ២៤ឆ្នាំ។ ជនសង្ស័យទាំង៧នាក់ រស់នៅ ស្រុកកំពង់ត្របែក ខេត្តព្រៃវែង។

ប្រភពពីស្ត្រីឈ្មោះ អ៊ុន សារឿន ភេទស្រី អាយុ ៤៥ឆ្នាំ រស់នៅភូមិតាមូង ឃុំថ្កូវ ស្រុកកំពង់ត្របែក បានឱ្យដឹងថា កាលពីវេលាម៉ោង ១២យប់រំលងធ្រាត្រ ឈានចូលថ្ងៃទី៣០ ខែ មីនា ឆ្នាំ ២០២៣ មានចោរចូលផ្ទះរបស់គាត់ ពេលឃើញចោរភ្លាម គាត់មានការភិតភ័យពេក ក៏ទូរសព្ទទៅប្រាប់បងប្រុសឈ្មោះ រុន រ៉ា អាយុ ៥២ឆ្នាំ នៅភូមិជាមួយគ្នា បន្តិចក្រោយមកក៏ឮសំឡេងស្រែកថា ចោរៗព័ទ្ធចាប់ៗ ឮសំឡេងជាច្រើននាក់ តែមិនដឹងថានរណាខ្លះនោះទេ ព្រោះគាត់មិនហ៊ានចេញពីក្នុងផ្ទះ ហើយសំឡេងស្រែកនោះ គឺនៅជាប់របងផ្ទះគាត់ផ្នែកខាងត្បូង។

ក្រោយពីស្រែកព័ទ្ធចាប់ រយៈពេល ១០នាទី បងរបស់គាត់ឈ្មោះ អ៊ុន រ៉ា ក៏ចូលក្នុងផ្ទះខ្លួនយកពិលទៅបំភ្លឺដើររកមើលចោរក្នុងដីភូមិទៀត តែមិនឃើញគាត់ក៏ត្រឡប់ទៅវិញ បន្ទាប់មកទៀតបងស្រីគាត់ឈ្មោះ អ៊ុន សារុំ បានមកដេកជាមួយខ្លួន លុះដល់ម៉ោងប្រហែល ៤ទៅ៥ទៀបភ្លឺ សមត្ថកិច្ចនគរបាលបានស្រែកហៅខ្លួន ឱ្យក្រោកឡើងសួរនាំពីហេតុការណ៍ចោរចូលលួច គាត់បានប្រាប់ថាចោរចូលលួចតែមិនបានលួចទ្រព្យសម្បត្តិអ្វីនោះទេ។

យោងតាមបំភ្លឺពីសាក្សីនៅជុំវិញកន្លែងកើតហេតុបានប្រាប់ឱ្យដឹងថា មុនពេលកើតហេតុ គេបានឮសំឡេងស្រែករបស់ម្ចាស់ផ្ទះឈ្មោះ ថា មានចោរចូលផ្ទះ និងឃើញក្រុមជនសង្ស័យទាំង ០៧នាក់ខាងលើ រត់ចេញពីរោងបុណ្យផ្ទះឈ្មោះ ជូ សុផល (ហៅប៉ិល)នាំគ្នាទៅព័ទ្ធផ្ទះរបស់ឈ្មោះ អ៊ុន សារឿន។ បន្ទាប់មកពួកគេចាប់ចោរនោះបាន ក៏ធ្វើសកម្មភាពព្រួតវាយបណ្ដាលឱ្យស្លាប់តែម្ដង។ ក្រោយពីកើតហេតុ សមត្ថកិច្ចបានចុះធ្វើការស្រាវជ្រាវប្រមូលភស្តុតាង និងឃាត់ខ្លួនជនសង្ស័យទាំង ៧នាក់ ខាងលើមកសាកសួរ និងកសាងសំណុំរឿងទៅតាមនីតិវិធី។ បច្ចុប្បន្ន ជនសង្ស័យទាំង០៧នាក់ រួមទាំងវត្ថុតាងសមត្ថកិច្ចជំនាញបានបញ្ជូនទៅសាលាដំបូងខេត្តព្រៃវែង ដើម្បីចាត់ការបន្តតាមនីតិវិធីច្បាប់ ៕