រន្ទះខែចែត្រ ផ្ដាច់ជីវិតកុមារា២នាក់បងប្អូន និងក្មេងស្រីម្នាក់សន្លប់ក្នុងពេលតែមួយ
ខេត្តបាត់ដំបង ៖ ពិតជាគួរឲ្យសង្វេគក្រៃលែង នៅពេលក្មេងប្រុសអាយុក្រោម១០ឆ្នាំពីរនាក់បងប្អូនត្រូវរន្ទះបា.ញ់ស្លា.ប់ក្បែរដើមព្រីង ខណៈក្មេងស្រីម្នាក់ទៀតក៏ត្រូវរន្ទះបា.ញ់ដូចគ្នាដែរបណ្ដាលឲ្យសន្លប់ ហេតុការណ៍បានកើតឡើងក្នុងពេលតែមួយតែប៉ុណ្ណោះ កាលពីវេលាម៉ោង៧ល្ងាច ថ្ងៃទី២៩ ខែមេសា ឆ្នាំ២០២៣ ស្ថិតនៅក្នុងឃុំព្រែកជីក និងឃុំព្រៃត្រឡាច ស្រុករុក្ខគិរី។ បើតាមសេចក្ដីរាយការណ៍បានឲ្យដឹងថា រន្ទះបា.ញ់ខាងលើនេះ កើតឡើង២ករណីព្រមៗគ្នាក្នុងពេលតែមួយ ហើយក៏បានផ្ដាច់ជីវិតកុមារាចំនួន២នាក់បងប្អូនយ៉ាងអាណោចអាធ័ម រីឯកុមារីម្នាក់ទៀតដួលសន្លប់។
បើតាមនាយប៉ុស្ដិ៍រដ្ឋបាល ឃុំព្រៃត្រឡាច លោក អ៊ីន សុខរ៉ាវ បានប្រាប់កោះសន្តិភាពឱ្យដឹងថា ភ្លៀងលាយឡំជាមួយនឹងខ្យល់កន្ត្រាក់ បង្កឲ្យមានផ្គររន្ទះយ៉ាងខ្លាំងក្លាផងដែរ ដែលបានកើតឡើងស្ទើរតែគ្រប់ទីកន្លែងនៅក្នុងមូលដ្ឋាន។ លោកបន្តថា នៅឃុំព្រៃត្រឡាច ក៏មានភ្លៀងធ្លាក់តិចតូច ប៉ុន្តែបង្កឲ្យមានខ្យល់ និងផ្គររន្ទះខ្លាំងគួរឲ្យខ្លាច។ លោកមេប៉ុស្ដិ៍បានប្រាប់បន្តថា កុមារារងគ្រោះ២នាក់បងប្អូនខាងលើនេះ ត្រូវរន្ទះបា.ញ់នៅពេលដែលពួកគេកំពុងឡើងបេះផ្លែព្រីង។ ពេលនោះមេឃរលឹមតិចៗ តែមានផ្គររន្ទះខ្លាំងៗ។
លោកមេប៉ុស្ដិ៍បញ្ជាក់ថា ក្មេងប្រុស២នាក់បងប្អូននេះ រស់នៅជាមួយជីដូនចាស់ជរា រីឯឪពុកម្ដាយរបស់គេរវល់ទៅស៊ីឈ្នូលធ្វើនំប៉័ងឲ្យគេនៅស្រុកមោងឬស្សី លុះពេលដឹងថា កូនៗមានគ្រោះថ្នាក់ ទើបមានការភ្ញាក់ផ្អើលផងតែម្តង។
សូមបញ្ជាក់ផងដែរថា នៅល្ងាចថ្ងៃទី២៩ ខែមេសា នៅខេត្តបាត់ដំបង ស្ទើរគ្រប់ទីកន្លែង មិនថា នៅតាមបណ្ដាស្រុក ឬនៅក្នុងក្រុងបាត់ដំបងនោះទេ បានរងនូវគ្រោះធម្មជាតិយ៉ាងធ្ងន់ធ្ងរ។ ហើយភ្លៀងដែលលាយឡំដោយខ្យល់កន្ត្រាក់ និងផ្គររន្ទះយ៉ាងខ្លាំងក្លានោះ បានប៉ះទង្គិចទៅលើស្រុកមួយចំនួន បណ្ដាលឲ្យរប៉ើកដំបូលផ្ទះ សាលារៀន និងមានរន្ទះបា.ញ់ឆក់យកជីវិតមនុស្ស និងសត្វពាហនៈផងដែរ។ ខណៈពេលនេះ សមត្ថកិច្ច និងអាជ្ញាធរដែនដី បាននិងកំពុងចុះត្រួតពិនិត្យនៅតាមកន្លែងដែលជួបគ្រោះមហន្តរាយទាំងនោះហើយ៕
Post a Comment