យុវជន ពីរក្រុម ឈ្មោះគ្នា តាម Facebook ណាត់គ្នាប្រយុទ្ធ
យុវជន៣នាក់ ត្រូវកម្លាំងសមត្ថកិច្ចប៉ុស្តិ៍នគររដ្ឋបាលចោមចៅទី៣ ឃាត់ខ្លួន និងដកហូតកាំបិ.តប៉័ងតោ ដាវ និងខ្សែក្រវ៉ាត់។ ហេតុការណ៍នេះកើតឡើងកាលពីវេលាម៉ោង១២និង១០នាទីយប់រំលងអធ្រាត្រឈានចូលថ្ងៃទី០៩ ខែមេសា ឆ្នាំ២០២៣ នៅត្រង់ចំណុចមុខផ្សារព្រៃទារ ផ្លូវបេតុង ស្ថិតក្នុងភូមិត្រពាំងជ្រៃ សង្កាត់ការកាបទី២ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មាននៅកន្លែងកើតហេតុបានឱ្យដឹងថា នៅមុនពេលកើតហេតុ គេបានឃើញក្រុមយុវជនទាំង៣នាក់ កំពុងតែឈររង់ចាំណាត់ជួបភាគីមួយក្រុមដែលមានជម្លោះជាមួយយុវជនមួយក្រុមទៀតតាមរយៈឆាតហ្វេសប៊ុក ហើយក៏ឆាតណាត់គ្នា ដើម្បីកា.ប់គ្នា ដោយឈររង់ចាំនៅន្លែងកើតហេតុខាងលើ។ ស្របពេលនោះ មិនទាន់បានណាត់គ្នាជួបផង ក៏ជួបនឹងកម្លាំងប៉ុស្តិ៍នគរបាលរដ្ឋបាលចោមចៅទី៣ ដែលកំពុងជិះម៉ូតូល្បាតពួនស្ទាក់នៅក្នុងមូលដ្ឋាន ហើយមានការសង្ស័យក៏ឃាត់ខ្លួនយុវជនទាំង៣នាក់ ដើម្បីសួរនាំ និងឆែកឆេរ ស្រាប់តែរកឃើញមានកាំបិ.តប៉័ងតោចំនួន២ដើម ដាវមួយដើម និងខ្សែក្រវាត់មួយខ្សែទៀតផង។
ក្រោយពីឃាត់ខ្លួន និងឆែកឆេររួចរាល់ហើយ កម្លាំងប៉ុស្តិ៍នគរបាលរដ្ឋបាលចោមចៅទី៣ បានប្រគល់ក្រុមយុវជនទាំង៣នាក់ រួមទាំងវត្ថុតាង ទៅឱ្យប៉ុស្តិ៍នគរបាលរដ្ឋបាលការកាបទី២វិញ ដើម្បីសួរនាំ និងចាត់ការតាមនីតិវិធីច្បាប់បន្តទៀត៕
Post a Comment