ក្មេងប្រុសម្នាក់ ក្នុងចំណោមក្មេងប្រុសទាំង១២នាក់ ជាប់ក្នុងរូងភ្នំថាំហ្លួង ជិត៥ឆ្នាំមុន បានស្លាប់នៅប្រទេសអង់គ្លេស
ក្មេងប្រុសម្នាក់ ក្នុងចំណោមក្មេងប្រុសទាំង១២នាក់ ដែលត្រូវបានជួយសង្គ្រោះចេញពីរូងភ្នំដែលលិចទឹកក្នុងប្រទេសថៃ កាលពីឆ្នាំ២០១៨ បន្ទាប់ពីជាប់អស់រយៈពេលជាង២សប្តាហ៍ ត្រូវបានប្រកាសថា ស្លា.ប់បាត់បង់ជីវិតនៅក្នុងប្រទេសអង់គ្លេស ជាកន្លែងដែលរូបគេកំពុងរៀននៅសាលាបាល់ទាត់ នៅទីនោះ។ នេះបើយោងតាមមូលនិធិ ដែលឧបត្ថម្ភការសិក្សារបស់ក្មេងប្រុសរូបនេះ បានប្រកាសកាលពីថ្ងៃទី១៥ ខែកុម្ភៈ។ នេះបើតាមប្រភពពី CNN ចេញផ្សាយកាលពីថ្ងៃទី១៦ ខែកុម្ភៈ កន្លងទៅថ្មីៗនេះ។
ក្មេងប្រុសរូបនោះ មានឈ្មោះថា Dom Duangpet Phromthep អាយុ១៧ឆ្នាំ ត្រូវបានប្រទះឃើញសន្លប់បាត់ស្មារតីក្នុងបន្ទប់ស្នាក់នៅ កាលពីថ្ងៃទី១២ ខែកុម្ភៈ នៅសាលាបាល់ទាត់ Brooke House College Football Academy ក្នុងតំបន់ Leicestershire ហើយត្រូវបានបញ្ជូនទៅមន្ទីរពេទ្យ ដែលជាកន្លែងរូបគេត្រូវបានប្រកាសថា បាត់បង់ជីវិត កាលពីថ្ងៃទី១៤ ខែកុម្ភៈ ខណៈដែលខាងសាលាក៏បានបញ្ជាក់ពីការស្លា.ប់របស់គេផងដែរ។ ប៉ុន្តែមកដល់ពេលនេះ ការស្លា.ប់របស់ Dom មិនទាន់ត្រូវបានបញ្ជាក់ច្បាស់លាស់នៅឡើយទេ។
យ៉ាងណាមិញ តាមសាខាតំបន់ភាគខាងជើងនៃការិយាល័យទំនាក់ទំនងសាធារណៈរបស់រដ្ឋាភិបាលថៃ គ្រាន់តែជូនដំណឹងនៅលើទំព័រហ្វេសប៊ុកថា Phromthep អាយុ១៧ឆ្នាំ បានស្លា.ប់ដោយសារឧបទ្ទវហេតុមួយ ដោយពុំបានផ្តល់ព័ត៌មានលម្អិតណាមួយបន្ថែមនោះទេ។
លោក Kiatisuk Senamuang អតីតប្រធានក្រុមជម្រើសជាតិថៃ និងគ្រូបង្វឹកក្រុមរហស្សនាម «ដំរីសឹក» មួយនេះ ដែលត្រូវបានស្គាល់យ៉ាងច្បាស់ថា «Zico» ដែលប្រធានមូលនិធិ Zico Foundation ដែលឧបត្ថម្ភការសិក្សារបស់ Dom បានសរសេរនៅលើគណនីហ្វេកប៊ុកផ្ទាល់ខ្លួន កាលពីថ្ងៃទី១៥ កុម្ភៈ ថា «Zico Foundation សូមចូលរួមរំលែកទុក្ខចំពោះមរណភាពរបស់ Dom Duangpet Phromthep ដែលជានិស្សិតអាហារូបករណ៍របស់ Zico Foundation»។
ម្តាយរបស់ Dom ដែលបានចូលរួមក្នុងសន្និសីទសារព័ត៌មានតាមប្រព័ន្ធអ៊ីនធឺណែតបាននិយាយថា គាត់សង្ឃឹមថាព្រះសង្ឃពុទ្ធសាសនានៅប្រទេសអង់គ្លេស អាចធ្វើពិធីដល់កូនប្រុសរបស់គាត់ ដើម្បីកុំឱ្យវិញ្ញាណរបស់គេជាប់នៅទីកន្លែង ដែលគេបានស្លា.ប់ ទៅតាមជំនឿព្រះពុទ្ធសាសនា។
យោងតាមសេចក្តីថ្លែងការណ៍របស់សាលា Brooke House កំពុងទំនាក់ទំនងជាមួយអាជ្ញាធរច្បាប់ និងស្ថានទូតថៃប្រចាំទីក្រុងឡុងដ៍ ហើយរ៉ាប់រងទាំងអស់សម្រាប់ដំណើរការបន្តបន្ទាប់ទៀត នៃសាកស.ពរបស់ Dom។
គួររំលឹកថា Dom គឺជាប្រធានក្រុម Wild Boars ដែលជាក្រុមបាល់ទាត់យុវជននៅខេត្ត Chiang Rai ភាគខាងជើងប្រទេសថៃ។ សមាជិកចំនួន១២នាក់នៃក្រុមដែលមានអាយុចន្លោះពី ១១ ទៅ ១៦ឆ្នាំ និងគ្រូបង្វឹកម្នាក់អាយុ២៥ឆ្នាំ បង្កភាពភ្ញាក់ផ្អើលទូទាំងពិភពលោក កាលពីខែមិថុនា ឆ្នាំ២០១៨ នៅពេលដែលពួកគេទៅលេងនៅរូងភ្នំថាំហ្លួង (Tham Luang) ក្នុងស្រុក Mae Sai ហើយក៏ជាប់នៅក្នុងនោះតែម្តង ដែលក្រោយមកក៏មានទឹកជំនន់ កើនឡើងយ៉ាងឆាប់រហ័ស ហើយប្រតិបត្តិការស្វែងរក និងជួយសង្គ្រោះដ៏ធំត្រូវបានចាប់ផ្តើម ដែលពាក់ព័ន្ធនឹងអ្នកមុជទឹកអន្តរជាតិជាច្រើនផងដែរ។
ពួកគេបានចំណាយពេលជាច្រើនថ្ងៃ នៅក្នុងរូងភ្នំ មុនពេលអ្នកមុជទឹកបានប្រទះឃើញពួកគេនៅជ្រៅក្នុងរូងភ្នំ ដែលពោរពេញដោយភាពកខ្វក់ ខណៈដែលដំណឹងរបស់ពួកគេ ត្រូវបានតាមដានយ៉ាងយកចិត្តទុកដាក់បំផុត ក៏ដូចជាចេញផ្សាយទៅកាន់ពិភពលោកយ៉ាងកក្រើកផងដែរ។
ការស្លា.ប់របស់ Dom បង្កការភ្ញាក់ផ្អើលយ៉ាងខ្លាំង ស្របពេលមិត្តរួមក្រុម Wild Boars របស់គេ រួមនឹងមហាជនថៃ បានបង្ហោះសារសោកស្តាយ និងចូលរួមរំលែកទុក្ខចំពោះការបាត់បង់នេះ៕ (ដកស្រង់ចេញពី CNN និង NPR)
Post a Comment