ថ្មីទៀតហើយ! មន្ត្រីពន្ធដាខេត្ត ចុះចាប់គោយន្តដឹកដី ឲ្យបង់ពន្ធកណ្តាលវាលស្រែ នៅក្រុងស្វាយរៀង
ខេត្តស្វាយរៀង ៖ មានការរិះគន់ពីមហាជនយ៉ាងខ្លាំងនៅពេលឃើញមន្ត្រីពន្ធដាខេត្តស្វាយរៀង និងសមត្ថកិច្ច ចុះចាប់ឃាត់គោយន្តដល់វាលស្រែ ហើយឲ្យបង់ប្រាក់ក្នុង១គ្រឿង រហូត២សែនរៀលក្នុង១ឆ្នាំ ធ្វើឲ្យម្ចាស់គោយន្តត្អូញត្អែរថា បង់ពន្ធថ្លៃជាងរថយន្តធុនតូច។ ហើយមន្ត្រីពន្ធដាចុះអនុវត្តច្បាប់ ចាប់គោយន្តដឹកដីនៅកណ្តាលវាលស្រែផាកពិន័យចំនួន២០ម៉ឺនរៀលក្នុងមួយគ្រឿង ដែលពលរដ្ឋបានបង្ហោះតាមបណ្ដាញសង្គម កំពុងតែផ្ទុះការចាប់អារម្មណ៍យ៉ាងខ្លាំង។ ករណីនេះ បានកើតឡើងកាលពីថ្ងៃទី១៥ ខែកុម្ភៈ ឆ្នាំ២០២៣ ស្ថិតក្នុងភូមិពភ្លា សង្កាត់សង្ឃ័រ ក្រុងស្វាយរៀង ខេត្តស្វាយរៀង។
បើតាមប្រជាពលរដ្ឋបានលើកឡើងថា គោយន្តកែច្នៃរបស់ពួកគាត់ ជាគោយន្តដែលបំពាក់ដោយម៉ាស៊ីនគោយន្ត គឺមិនមែនជាម៉ាស៊ីនរថយន្តនោះទេ ដូច្នេះសូមមន្ត្រីជំនាញពិនិត្យ និងពិចារណាឡើងវិញ ចំពោះការផាកពិន័យទៅលើគោយន្តរបស់ពួកគាត់ ដែលប្រកបរបររកស៊ីដឹកដីបានបន្តិចបន្តួច គ្រាន់តែចិញ្ចឹមជីវិតនោះ។
ជុំវិញករណីខាងលើនេះដែរ មន្ត្រីពន្ធដាខេត្តស្វាយរៀង បានបញ្ជាក់នាព្រឹកថ្ងៃទី១៦ ខែកុម្ភៈ ឆ្នាំ២០២៣នេះថា យោងតាមប្រកាសលេខ៥៣១ សហវ ចុះថ្ងៃទី៣០ ខែឧសភា ឆ្នាំ២០១៨ ស្តីពីការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំរបស់ក្រសួងសេដ្ឋកិច្ច និងហិរញ្ញវត្ថុ ក្នុងឧបសម្ព័ន្ធ១ ចំណុច ខ១ បានចែងថា រថយន្តដែលបំប្លែងមកពីគោយន្ត ត្រូវបង់ពន្ធចំនួន២០០,០០០រៀលសម្រាប់១ឆ្នាំ ក្នុងមួយគ្រឿង។
មន្ត្រីដដែលបានបន្តថា កាលពីថ្ងៃទី១៥ ខែកុម្ភៈ ឆ្នាំ២០២៣នេះ ក្រុមការងារចុះពិនិត្យពន្ធលើមធ្យោបាយដឹកជញ្ជូន និងយាន្តជំនិះគ្រប់ប្រភេទរបស់សាខាពន្ធដាខេត្តស្វាយរៀង បានចុះពិនិត្យតាមដងផ្លូវនៅជិតនឹងទីតាំងដែលយានយន្តកែច្នៃនោះ កំពុងចរាចរណ៍ និងប្រកបអាជីវកម្ម ហើយបានពិនិត្យឃើញថា មិនទាន់បង់ពន្ធលើមធ្យោបាយដឹកជញ្ជូននៃយានជំនិះនៅឡើយ ស្របតាមប្រកាសជាធរមាន ទើបកម្លាំងចម្រុះចុះដល់ទីតាំងដើម្បីណែនាំ និងអញ្ជើញម្ចាស់គោយន្តកែច្នៃទាំងនោះ មកបង់នៅតាមគោលដៅដែលបានកំណត់។
មន្ត្រីបានបញ្ជាក់ថា គោយន្តកែច្នៃទាំងនោះ ជាប្រភេទយានយន្តអាជីវកម្មដឹកដី មិនមែនជាយានយន្តកសិកម្មសុទ្ធសាធនោះទេ។ លើសពីនេះ ក្នុងករណីបើពិនិត្យឃើញថា មន្ត្រីចុះអនុវត្តផ្ទាល់បានប្រព្រឹត្តខុសពីគោលការណ៍ក្នុងប្រការណាមួយ អគ្គនាយកដ្ឋានពន្ធដានឹងចាត់វិធានការយ៉ាងឆាប់រហ័សផងដែរ។
មហាជនចោទសួរថា តើគោយន្តច្នៃដឹកដីចំណុះ១គូបនេះ ត្រូវជាប់ពន្ធ២០ម៉ឺនរៀលមែនឬ?
Post a Comment