ច្រកព្រំដែនខេត្តបន្ទាយមានជ័យ ក្នុងមួយថ្ងៃៗអាចរកចំណូលថវិកាចូលរដ្ឋជាង ១លានដុល្លារ

ភ្នំពេញ៖ អភិបាលខេត្តបន្ទាយមានជ័យ បានថ្លែងថា ចំណូលពន្ធគយដែលអាចទាញបានពីតាមច្រកព្រំដែននានា ក្នុងខេត្តបន្ទាយមានជ័យ រកដាក់ចូលក្នុងចំណូលជាតិ បានប្រមាណពី១-១,៥លានដុល្លារអាម៉េរិកក្នុងមួយថ្ងៃៗ ។

ក្នុងសន្និសីទសារព័ត៌មានស្តីពី ភាពជោគជ័យក្នុងរយៈពេល ៥ឆ្នាំ របស់រដ្ឋបាលខេត្តបន្ទាយមានជ័យ នៅថ្ងៃទី២៨ ខែមីនា ឆ្នាំ២០២៣ ឯកឧត្តម អុំ រាត្រី មានប្រសាសន៍ថា ដោយខេត្តនៅជាប់នឹងព្រំដែនប្រទេសថៃ ដែលជាកត្តាអំណោយផលល្អ ដល់ការដោះដូរ ដឹកជញ្ជូនទំនិញ ការធ្វើពាណិជ្ជកម្ម ការធ្វើដំណើរចេញ-ចូល ទេសចរណ៍ ការធ្វើកិច្ចសហប្រតិបត្តិការ និងបានជួយជំរុញដល់កំណើនសេដ្ឋកិច្ចរបស់ខេត្តផងដែរ ។

ឯកឧត្តមបន្តថា ច្រកព្រំដែនខេត្តបន្ទាយមានជ័យ ក្នុងថ្ងៃខ្លះ អាចប្រមូលពន្ធគយទាបជាងច្រកខេត្តព្រះសីហនុ និងថ្ងៃខ្លះមានចំនួនច្រើនជាង ដែលជាមធ្យមបានប្រមាណពី ១លាន ទៅ១លានដុល្លារកន្លះ សម្រាប់ដាក់ចូលក្នុងចំណូលជាតិ ដែលនេះនៅមិនទាន់និយាយ ពីការ ប្រមូលចំណូលផ្ទៃក្នុងនោះទេ ។

ឯកឧត្តមអភិបាលខេត្តបន្តថា បច្ចុប្បន្នខេត្តបន្ទាយមានជ័យ មានកសិផលមានសក្ដានុពលជាច្រើនប្រភេទ នាំទៅកាន់ប្រទេសថៃ មានដូចជា ដំឡូងមី ម្ទេសក្រៀម អំពៅ ពោតក្រហម ស្វាយចន្ទី និងស្រូវជាដើម ខណៈខេត្តបន្ទាយមានជ័យ មានច្រកព្រំដែនធំៗមួយចំនួន ដើម្បីធ្វើពាណិជ្ជកម្ម និងចេញ-ចូលឆ្លងដែន ក្នុងមានច្រកអន្តរជាតិប៉ោយប៉ែត ច្រកស្ទឹងបត់ ច្រកអូរបីជាន់ និងច្រកបឹងត្រកួនជាដើម ។

ឯកឧត្តមអភិបាលខេត្ត បានបន្ថែមថា ចំពោះច្រកស្ទឹងបត់ រហូតមកដល់ពេលនេះ នៅមិនទាន់សម្រេចការសាងសង់នូវហេដ្ឋារចនាសម្ព័ន្ធបាន ១០០ភាគរយនៅឡើយទេ ប៉ុន្តែដើម្បីជួយសម្រួលការដល់ដឹកទំនិញ ភាគីកម្ពុជា និងថៃ ក៏បានសម្រេចបើកច្រកនេះ ឲ្យមានការដឹកជញ្ជូនទំនិញឆ្លងដែន ដើម្បីបញ្ចៀសការកក់ស្ទះនៅតាមច្រកផ្សេងៗ ៕