អនិច្ចា! ជាងផ្សាដែកម្នាក់ជួបគ្រោះអកុសល ខណៈពេលលើកដែកប៉ះខ្សែភ្លើង ហើយធ្លាក់ពីលើដំបូល
ខេត្តបាត់ដំបង ៖ ជាងផ្សាដែកម្នាក់ត្រូវចរន្តអគ្គិសនីឆក់ ហើយធ្លាក់ពីលើដំបូល បណ្ដាលឲ្យស្លា.ប់ភ្លាមៗកាលពីវេលាម៉ោង៤រសៀល ថ្ងៃទី០២ ខែមីនា ឆ្នាំ២០២៣ នៅចំណុចភូមិកូនភ្នំខាងជើង ឃុំតាស្ដា ស្រុកសំពៅលូន ខណៈពេលជនរងគ្រោះលើកដែកទៅប៉ះចំខ្សែចរន្តអគ្គិសនីនៅក្បែរដំបូលផ្ទះ។
សេចក្ដីរាយការណ៍បានឲ្យដឹងថា ជនរងគ្រោះខាងលើមានឈ្មោះ សាង ស៊ីណា ភេទប្រុស អាយុ៣៩ឆ្នា មានមុខរបរជាងដែក រស់នៅភូមិ ឃុំកើតហេតុ។ ជនរងគ្រោះ ត្រូវចរន្តអគ្គិសនីឆក់ធ្លាក់ពីលើដំបូល ខណៈពេលកំពុងបំពេញការងារ ហើយបានស្លា.ប់ភ្លាមៗនៅនឹងកន្លែងកើតហេតុតែម្តង។
បើតាមសាក្សីបាននិយាយប្រាប់សមត្ថកិច្ចថា ជនរងគ្រោះបានឡើងផ្សាដែកនៅលើដំបូលជាមួយជាងៗដទៃទៀត ប៉ុន្តែពេលនោះគាត់ហាក់មានការធ្វេសប្រហែសបន្តិច ពេលលើកដែកឡើងលើដំបូលក៏ប៉ះចំខ្សែបណ្ដាញអគ្គិសនីដែលនៅក្បែរដំបូលនោះ ទើបឆ្លងចរន្តឆក់ដល់គាត់ពេញទំហឹង បណ្ដាលឲ្យធ្លាក់ស្លា.ប់ភ្លាមៗតែម្ដង។
ក្រោយពេលកើតហេតុ សមត្ថកិច្ចបានចុះទៅកាន់កន្លែងកើតហេតុភ្លាមៗដែរ ដើម្បីពិនិត្យស្ថានភាពជាក់ស្ដែង។ ហើយសមត្ថកិច្ចបាននិយាយថា ករណីខាងលើនេះ បានកើតឡើងដោយសារការធ្វេសប្រហែស។ ការសាងសង់សំណង់នោះ ហាក់កៀកទៅនឹងខ្សែបណ្ដាញអគ្គិសនីដែលមានតុងស្យុងខ្ពស់ ហើយនៅពេលគាត់លើកដែកឡើងលើ ដោយខ្វះការប្រុងប្រយ័ត្នក៏ប៉ះចំខ្សែភ្លើងឆ្លងចរន្តឆក់ពេញទំហឹងតែម្ដង៕
Post a Comment