រកឃើញត្រីមានពិសខ្លាំងបំផុតក្នុងលោក ក្នុង ហាងបាយ១កន្លែង ខេត្តភូកេត ប្រទេសថៃ
កាលពីពេលថ្មីៗនេះ, សមត្ថកិច្ចថៃចុះឆែកឆេរនៅក្នុងភោជនីយដ្ឋានមួយកន្លែង និងរកឃើញថាទីនោះមានចម្អិនអាហារពីត្រីដែលអាចបង្កគ្រោះថ្នាក់ដល់អាយុជីវិតរបស់អតិថិជន។ ករណីនេះកើតមាននៅខេត្តភូកេត។ បន្ទាប់ពីមានពាក្យចចាមអារ៉ាម និងបាតុភាពមិនប្រក្រតីមួយ, សមត្ថកិច្ចក៏ចាត់កម្លាំងទៅភោជនីយដ្ឋាននោះ ហើយរកឃើញត្រីមួយប្រភេទដែលស្ថិតនៅក្នុងបញ្ជីហាមឃាត់។ នោះគឺត្រីថ្ម(stonefish)ដែលមានជាតិពុលខ្លាំងជាងត្រីណាៗទាំងអស់។
បន្ទាប់ពីទទួលការរាយការណ៍ពីប្រជាពលរដ្ឋថាភោជនីយដ្ឋាននៅភូកេតនោះលក់សត្វដែលស្ថិតនៅក្នុងបញ្ជីហាមឃាត់, សមត្ថកិច្ចក៏ចុះឆែកឆេរ និងរកឃើញត្រីថ្មចំនួនមួយក្បាល។ ក្រោយមក, សមត្ថកិច្ចសម្រេចចិត្តនាំខ្លួនម្ចាស់ហាងទៅអធិការដ្ឋាននគរបាលទីរួមខេត្តភូកេតដើម្បីចាត់វិធានការទៅតាមផ្លូវច្បាប់។ សូមជម្រាបថាត្រីថ្មជាសត្វត្រីដែលមានពិសសាហាវណាស់។ ពិសរបស់វាបញ្ចេញមកក្រៅនៅពេលយើងច្រឡំដើរជាន់ធ្មុង ឬព្រុយរបស់វា។
ពិសរបស់ត្រីថ្មបើមុតចូលទៅក្នុងសាច់របស់មនុស្សនឹងបង្កការឈឺចុកចាប់ជាទីបំផុត។ បើនរណាម្នាក់ត្រូវពិសរបស់វាហើយនៅតែបណ្ដែតបណ្ដោយយូរពេក មិនព្រមយកទៅពេទ្យ, ជនរងគ្រោះអាចនឹងស្លាប់។ និយាយទៅពិសរបស់វាសាហាវដូចពិសពស់ផងដែរ។ នៅប្រទេសថៃ, ការលក់សត្វសមុទ្រដែលស្ថិតនៅក្នុងបញ្ជីហាមឃាត់គឺជាបទល្មើសធ្ងន់ធ្ងរ ដែលត្រូវពិន័យជាប្រាក់យ៉ាងច្រើនសន្ធឹកសន្ធាប់ និងជាប់ពន្ធនាគារថែមទៀត។
នៅខេត្តភូកេត, បទល្មើសប្រភេទនេះធ្លាប់កើតមានប៉ុន្មានដងផងដែរកាលពីអតីតកាល។ ករណីភោជនីយដ្ឋាននៅខេត្តភូកេតលក់ត្រីដែលមានពិសបំផុតនៅក្នុងលោកនេះកើតឡើង២អាទិត្យក្រោយពេលសមត្ថកិច្ចទើបតែចុះឆែកឆេរភោជនីយដ្ឋានបណ្ដែតទឹក២កន្លែងនៅខេត្តភូកេតដដែលនេះ។ សមត្ថកិច្ចរកឃើញថាភោជនីយដ្ឋានទាំង២នោះរក្សាទុកត្រីកន្ទុយបីសម្រាប់ត្រៀមធ្វើម្ហូបជូនភ្ញៀវ។ វាជាប្រភេទត្រីដែលសមត្ថកិច្ចមិនអនុញ្ញាតឱ្យចាប់យកទៅធ្វើម្ហូប ឬរក្សាទុកជាដាច់ខាត៕
Post a Comment