អាម៉េរិកចោទចិនថាព្យាយាមលាក់បាំងអំពើឃោរឃៅរបស់កូរ៉េខាងជើង
សហរដ្ឋអាម៉េរិកបានចោទប្រកាន់ប្រទេសចិនកាលពីថ្ងៃសុក្រទី ១៧ ខែមីនាថា បានព្យាយាមលាក់បាំងអំពើឃោរឃៅរបស់កូរ៉េខាងជើងពីពិភពលោក ដោយការបិទបណ្តាញផ្សាយនៃកិច្ចប្រជុំក្រៅផ្លូវការរបស់សមាជិកក្រុមប្រឹក្សាសន្តិសុខអង្គការសហប្រជាជាតិស្តីពីការចោទប្រកាន់ពីបទរំលោភសិទ្ធិមនុស្សដោយក្រុងព្យុងយ៉ាង។
ឯកអគ្គរដ្ឋទូតសហរដ្ឋអាម៉េរិកប្រចាំអង្គការសហប្រជាជាតិ លោកស្រី Linda Thomas-Greenfield បានប្រាប់កិច្ចប្រជុំ ដោយសំអាងលើចិន និងរុស្ស៊ីថា ៖«សមាជិកក្រុមប្រឹក្សាមួយចំនួនមានឆន្ទៈក្នុងការការពារកូរ៉េខាងជើងពីការទទួលខុសត្រូវរបស់ពួកគេ»។
ចិន និងរុស្ស៊ីប្រកែកថា ក្រុមប្រឹក្សាសន្តិសុខដែលមានសមាជិក១៥ ប្រទេស ដែលមានតួនាទីរក្សាសន្តិភាព និងសន្តិសុខអន្តរជាតិមិនគួរពិភាក្សាបញ្ហាសិទ្ធិមនុស្សទេ។ លើសពីនេះ បងប្អូនកុម្មុយនីស្ដទាំងពីរបានលើកឡើងថា កិច្ចប្រជុំបែបនេះគួរតែត្រូវបានកំណត់ដោយស្ថាប័នអង្គការសហប្រជាជាតិផ្សេងទៀតដូចជាក្រុមប្រឹក្សាសិទ្ធិមនុស្សរបស់អង្គការសហប្រជាជាតិ ឬមហាសន្និបាតអង្គការសហប្រជាជាតិជាដើម។
អ្នកការទូតចិន លោក Xing Jisheng បានលើកឡើងថា កិច្ចប្រជុំដែលសហម្ចាស់ផ្ទះដោយសហរដ្ឋអាម៉េរិក និងអាល់បានីគឺមិនមានលក្ខណៈស្ថាបនាតាមមធ្យោបាយណាមួយឡើយ។ លោកបានបន្តថា ៖«ជំនួសឱ្យការបន្ធូរបន្ថយភាពតានតឹង វាអាចនឹងធ្វើឱ្យមានជម្លោះកាន់តែខ្លាំងឡើង ក៏ដូចជាការមិនទទួលខុសត្រូវផងដែរ។ ការប្រើប្រាស់បណ្តាញទូរទស្សន៍របស់អង្គការសហប្រជាជាតិសម្រាប់ការផ្សាយបន្តផ្ទាល់គឺជាការខ្ជះខ្ជាយធនធានរបស់អង្គការសហប្រជាជាតិ»។
លោកស្រី Thomas-Greenfield បាននិយាយថា កម្មវិធីនុយក្លេអ៊ែរ និងមីស៊ីលផ្លោងរបស់កូរ៉េខាងជើងមានទំនាក់ទំនងយ៉ាងជិតស្និទ្ធទៅនឹងការរំលោភសិទ្ធិមនុស្សរបស់របបផ្តាច់ការមួយនេះ។ មិនត្រឹមតែប៉ុណ្ណោះ លោកស្រីបានបន្តថា៖ «ការស្វែងរកអាវុធប្រល័យលោកតែងតែប៉ះពាល់ដល់សិទ្ធិមនុស្ស និងតម្រូវការមនុស្សធម៌របស់ប្រជាជន ដោយមេដឹកនាំកូរ៉េខាងជើងលោក គីម ជុងអ៊ុន ( Kim Jong Un) បានជ្រើសរើសគ្រាប់កាំភ្លើង និងមីស៊ីលជំនួសឱ្យអាហារូបត្ថម្ភសម្រាប់មនុស្សជាតិ»។
ទោះបីជាយ៉ាងណាក៏ដោយ ក្រុងព្យុងយ៉ាងបដិសេធការចោទប្រកាន់ពីការរំលោភសិទ្ធិមនុស្ស និងបន្ទោសទណ្ឌកម្មចំពោះស្ថានការណ៍មនុស្សធម៌ដ៏ធ្ងន់ធ្ងរនៅកូរ៉េខាងជើង។ មែនទែនទៅ ប្រទេសឯកោនេះស្ថិតនៅក្រោមការដាក់ទណ្ឌកម្មរបស់អង្គការសហប្រជាជាតិជុំវិញកម្មវិធីមីស៊ីលផ្លោង និងនុយក្លេអ៊ែររបស់ខ្លួនតាំងពីឆ្នាំ ២០០៦។
ជុំវិញរឿងរ៉ាវដ៏ក្ដៅគគុកនេះ អ្នកការទូតរុស្ស៊ីលោក Stepan Kuzmenkov បានប្រាប់អង្គប្រជុំថា ៖«ការព្រួយបារម្ភលាក់ពុតរបស់បស្ចិមប្រទេសអំពីសិទ្ធិមនុស្សនៅក្នុងប្រទេសកូរ៉េខាងជើង គឺមិនអាចបោកប្រាស់នរណាម្នាក់បានទេ ហើយមនុស្សគ្រប់គ្នាសុទ្ធតែដឹងយ៉ាងច្បាស់ថាសហរដ្ឋអាម៉េរិកប្រើសិទ្ធិមនុស្សដើម្បីជាលេសសម្រាប់ការមិនពេញចិត្តរបស់ពួកគេតែប៉ុណ្ណោះ»។
ជាចុងក្រោយ ក្រុមអ្នកការទូតបានបង្ហើបប្រាប់ថា ប្រឹក្សាសន្តិសុខអង្គការសហប្រជាជាតិ ទំនងជានឹងបើកកិច្ចប្រជុំផ្លូវការមួយនៅថ្ងៃចន្ទ សប្តាហ៍ក្រោយជុំវិញការបាញ់មីស៊ីលផ្លោងអន្តរទ្វីបរបស់កូរ៉េខាងជើងកាលពីថ្ងៃព្រហស្បតិ៍ ទី១៦ ខែមីនា៕
Post a Comment