ក្រសួងអប់រំមិនអនុញ្ញាតឲ្យលេងបា.ញ់ទឹក លាបម្ស៉ៅ និងល្បែងមិនមែនប្រជាប្រិយខ្មែរក្នុងបរិវេណសាលារៀន
រាជធានីភ្នំពេញ ៖ ក្រសួងអប់រំយុវជន និងកីឡា បានប្រកាសមិនអនុញ្ញាតឲ្យសិស្សានុសិស្សនៅគ្រឹះស្ថានសិក្សារបស់រដ្ឋ និងឯកជនទាំងអស់លេងល្បែងមិនមែនជាប្រជាប្រិយខ្មែរដូចជាបាញ់ទឹក លាបម្ស៉ៅ នៅក្នុងបរិវេណសាលារៀននោះទេ ។
ការប្រកាសនេះ ខណៈដែលក្រសួងអប់រំបានឲ្យគ្រឹះស្ថានសាធារណៈ និងឯកជនទាំងអស់នាំគ្នារៀបចំការលេងល្បែង និងរបាំប្រជាប្រិយខ្មែរ ក្នុងឱកាសត្រៀមអបអរសាទរ និងថ្ងៃប្រារព្ធពិធីបុណ្យចូលឆ្នាំប្រពៃណីជាតិ នៅតាមគ្រឹះ ស្ថានសិក្សាសាធារណៈ និងឯកជន ។
យោងតាមចេញសេចក្ដីណែនាំស្តីពីការលេងល្បែង និងរបាំប្រជាប្រិយខ្មែរ ក្នុងឱកាសត្រៀមអបអរសាទរ និងថ្ងៃប្រារព្ធពិធីបុណ្យចូលឆ្នាំប្រពៃណីជាតិ នៅតាមគ្រឹះស្ថានសិក្សាសាធារណៈ និងឯកជនរបស់ឯកឧត្តម ហង់ ជួនណារ៉ុន រដ្ឋមន្ត្រី ក្រសួងអប់រំយុវជន និងកីឡា កាលពីថ្ងៃទី១៥ មីនា ក្រសួងបានលើកឡើងថាដើម្បីចូលរួមអភិរក្ស និងលើកកម្ពស់វប្បធម៌ដូចជា ជំនឿ ទំនៀមទម្លាប់ ប្រពៃណីជាតិខ្មែរឱ្យបានគង់វង្ស និងរីកចម្រើន ព្រមទាំងចៀសវាងគ្រោះថ្នាក់ផ្សេងៗ។
ឯកឧត្តមរដ្ឋមន្ត្រីបានឡើងថា នៅក្នុងឱកាសត្រៀមអបអរសាទរ និងថ្ងៃប្រារព្ធពីធីបុណ្យចូលឆ្នាំប្រពៃណីជាតិខ្មែរសូមធ្វើការណែនាំដល់គ្រឹះស្ថានសិក្សាសាធារណៈ និងឯកជនបង្កលក្ខណៈឱ្យប្អូនៗកុមារ សិស្សានុសិស្ស និងយុវជនយើង លេងល្បែង និងរបាំប្រជាប្រិយខ្មែរនៅមុន និងក្នុងឱកាសបុណ្យចូលឆ្នាំប្រពៃណីជាតិ ដូចជា របាំរាំវង់ រាំក្បាច់ សារ៉ាវ៉ាន់ របាំត្រុដិ។ល។ និងល្បែងប្រជាប្រិយខ្មែរមួយចំនួនដូចជា ល្បែងបោះអង្គញ់ ចោលឈូង ដណ្តើមស្លឹកឈើ ទាញព្រ័ត្រជាដើម ។
ឯកឧត្តមបានស្នើឲ្យលោកគ្រូអ្នកគ្រូ ក្រុមប្រឹក្សាកុមារ ក្រុមប្រឹក្សាយុវជន ជួយជំរុញលើកទឹកចិត្ត និងសម្របសម្រួលឱ្យប្អូនៗកុមារ សិស្សានុសិស្ស និងយុវជន លេងល្បែង និងរបាំប្រជាប្រិយខ្មែរទាំងឡាយដូចក្នុងចំណុចទីមួយ ប្រកបដោយប្រសិទ្ធភាព និងសុវត្ថិភាព ។
ជាមួយគ្នានោះដែរ រដ្ឋមន្ត្រីក្រសួងអប់រំក៏បានប្រកាសហាមឃាត់ និងទប់ស្កាត់រាល់ល្បែងទាំងឡាយណា ដែលមិនមែនជាល្បែង ឬរបាំប្រជាប្រិយខ្មែរ និងល្បែងមួយចំនួនដែលប្រឈមនឹងហានិភ័យ អសុវត្ថិភាព និងគ្រោះថ្នាក់ដូចជាដុត ឬបា.ញ់ផាវ បាញ់ទឹក ជះទឹក លាប ម្សៅល។ ៤- សហការជិតស្និទ្ធជាមួយមាតាបិតា ឬអាណាព្យាបាលសិស្ស សហគមន៍ អាជ្ញាធរដែនដី ដើម្បីផ្ដល់ និងទទួលព័ត៌មានស្ដីពីការលេងល្បែងអសុវត្ថិភាពទាំងឡាយទាំង ក្នុងនិងក្រៅគ្រឹះស្ថានសិក្សា ដើម្បីរួមគ្នាទប់ស្កាត់ និងដោះស្រាយបញ្ហាទាន់ពេលវេលា៕
Post a Comment