ឃាត់ខ្លួនជនជាតិចិន០៣នាក់ វាយកញ្ចក់រថយន្តលួចយកសម្ភារមានតម្លៃ និងលួចស្លាកលេខ នៅក្រុងព្រះសីហនុ
ខេត្តព្រះសីហនុ ៖ ករណីអំពើលួចមានស្ថានទម្ងន់ទោស (វាយកញ្ចក់រថយន្តលួចយកលុយ និងសម្ភារមានតម្លៃ) មួយបានកើតឡើងនៅវេលាម៉ោងប្រហែល១១និង២៥នាទីព្រឹកថ្ងៃទី០៣ ខែមេសា ឆ្នាំ២០២៣ នៅចំណុចតំបន់សេដ្ឋកិច្ចពិសេស កំពង់ផែក្រុងព្រះសីហនុ ស្ថិតនៅភូមិ៣ សង្កាត់៣ ក្រុង-ខេត្តព្រះសីហនុ បង្កដោយជនសង្ស័យ ជាជនជាតិចិន បានធ្វើសកម្មភាព វាយបំបែកកញ្ចក់រថយន្តរបស់ប្រជាពលរដ្ឋ ដែលចតទុក នៅមុខតំបន់សេដ្ឋកិច្ចពិសេស កំពង់ផែក្រុងព្រះសីហនុ រួចលួចយកកាបូបលុយរបស់ប្រជាពលរដ្ឋ ដែលនៅក្នុងរថយន្ត ។
បន្ទាប់ពីទទួលបានបណ្តឹងរបស់ជនរងគ្រោះ និងដោយមានការចង្អុលបង្ហាញពីលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងការិយាល័យនគរបាលព្រហ្មទណ្ឌកម្រិតស្រាល បានសហការជាមួយកម្លាំងអធិការដ្ឋាននគរបាលក្រុងព្រះសីហនុ បានធ្វើការស្រាវជ្រាវរហូតធ្វើការបង្ក្រាបបានទាំងស្រុង ដោយចាប់ឃាត់ខ្លួនបានជនសង្ស័យជាជនជាតិចិន ចំនួន០៣នាក់ នៅចំណុច ភូមិ២ សង្កាត់៤ ក្រុង-ខេត្តព្រះសីហនុ វេលាម៉ោង ០៨និង៣០នាទីព្រឹកថ្ងៃទី០៤ ខែមេសា ឆ្នាំ២០២៣ ។
ជនសង្ស័យទាំង ០៣នាក់ មានឈ្មោះដូចខាងក្រោម ៖
១-ឈ្មោះ SHEN AO ភេទប្រុស ជនជាតិចិន អាយុ ៤៣ឆ្នាំ មុខរបរមិនពិតប្រាកដ ស្នាក់នៅភូមិ២ សង្កាត់៤ ក្រុង-ខេត្តព្រះសីហនុ ។
២-ឈ្មោះ JIN CHANGGE ភេទប្រុស ជនជាតិចិន អាយុ៥៦ឆ្នាំ មុខរបរមិនពិតប្រាកដ ស្នាក់នៅ ភូមិ២ សង្កាត់៤ ក្រុង-ខេត្តព្រះសីហនុ ។
៣-ឈ្មោះ LI HONGYUAN ភេទប្រុស ជនជាតិចិន អាយុ៥៦ឆ្នាំ មុខរបរមិនពិតប្រាកដ ស្នាក់នៅ ភូមិ២ សង្កាត់៤ ក្រុង-ខេត្តព្រះសីហនុ ។
វត្ថុតាងដែលចាប់យកបាន រួមមាន ៖
-លុយខ្មែរ ចំនួន ២០,០០០,០០០៛ “ម្ភៃលានរៀល” (ផលនៃអំពើចោរកម្ម)
-លុយប្រទេសអាស៊ាន ចម្រុះគ្រប់ប្រភេទមួយចំនួន (ផលនៃអំពើចោរកម្ម)
-ស្លាកលេខរថយន្ត ០២គូ (ផលនៃអំពើចោរកម្ម) ៖
១-បាត់ដំបង 2D-9008
២-កែប 2B-2122
-រថយន្ត ០១គ្រឿង ម៉ាក TOYOTA CAMRY ស៊េរីឆ្នាំ២០០៧ ពណ៌ស ផ្លាកលេខៈ ភ្នំពេញ 2BH-1287 (មធ្យោបាយ)
-ទល់រឺវីស ០២ដើម (ឧបករណ៍ប្រព្រឹត្តិបទល្មើស)
-ដង្កាប់ ០១ដើម (ឧបករណ៍ប្រព្រឹត្តិបទល្មើស)
-កាំបិត ០១ដើម (ឧបករណ៍ប្រព្រឹត្តិបទល្មើស)
-ឧបករណ៍វាយបំបែកកញ្ចក់រថយន្ត ០១ដើម (ឧបករណ៍ប្រព្រឹត្តិបទល្មើស)
-សោរច្នៃសម្រាប់កាច់បំបែកសោររថយន្ត ១៤ដើម (ឧបករណ៍ប្រព្រឹត្តិបទល្មើស)
-ស្រោមដៃ ០៤គូរ (ឧបករណ៍ប្រព្រឹត្តិបទល្មើស)
-កាបូបសំលៀកបំពាក់ ០១ មានសំលៀកបំពាក់ និងរបស់ប្រើប្រាស់មួយចំនួន
-វ៉ាលី សំលៀកបំពាក់ ០១ មានសំលៀកបំពាក់ និងរបស់ប្រើប្រាស់មួយចំនួន ។
បន្ទាប់ពីធ្វើការសាកសួរ ជនសង្ស័យបានសារភាពថា ពួកគាត់ធ្លាប់ធ្វើសកម្មភាពវាយកញ្ចក់រថយន្ត លួចយកកាបូបលុយសម្ភារៈ និងលួចដោះយកស្លាកលេខរថយន្ត សរុបចំនួន ០៥លើក ក្នុងនោះមាន ៖ វាយកញ្ចក់រថយន្ត លួចយកកាបូបលុយ និងសម្ភារៈ ចំនួន០៣លើក និងលួចដោះយកស្លាកលេខរថយន្តចំនួន ០២លើក ។
បច្ចុប្បន្ន ជនសង្ស័យខាងលើ ការិយាល័យនគរបាលព្រហ្មទណ្ឌកម្រិតស្រាល កំពុងកសាងសំណុំរឿងបញ្ជូនទៅសាលាដំបូងខេត្តព្រះសីហនុ ដើម្បីផ្តន្ទាទោសតាមផ្លូវច្បាប់ ៕
Post a Comment