ត្រីចិញ្ចឹម ងាប់ ដោយ​សារ​អាកាសធាតុក្តៅ មានប្រមាណជិត ៤០០តោន នៅខេត្តកំពង់ឆ្នាំង

គិតត្រឹមរសៀលថ្ងៃទី៦ ខែមេសានេះ បរិមាណ​ត្រីចិញ្ចឹម ដែលងា.ប់ ដោយ​សារ​អាកាសធាតុក្តៅ មានប្រមាណជិត ៤០០តោនហើយ។ នេះបើតាមការបូកសរុបរបស់មន្ត្រីជល​ផលនៃ​មន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង។

របាយការណ៍របស់ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ឆ្នាំង បានបញ្ជាក់ថា ត្រីចិញ្ចឹម ក្នុងបែ​នៅក្នុងភូមិចុងកោះ សង្កាត់​ខ្សាម ក្រុង​កំពង់ឆ្នាំង មានចំនួន ១៦០​បែ​។ ចំពោះ​​ផល​ប៉ះពាល់ ដែលបណ្ដាល​មក​ពី​អាកាសធាតុក្តៅ និង​មានទឹកភ្លៀងធ្លាក់កក់ខែមួយមេផង បាន​បណ្ដាល​ឲ្យងាប់ត្រី ចាប់ពីថ្ងៃទី១ ដល់ថ្ងៃទី​៥ ខែមេសា មានចំនួនសរុបចំនួន ៣៦២តោន​។ ​ក្នុងនោះ រួមមាន ត្រីខ្យា ចំនួន ៩០បែ ងា.ប់អស់ ២៧០តោន ត្រីឆ្ដោរ ចំនួន ២៥ បែ ងា.ប់​ អស់ ២៥តោន​ ត្រីចម្រុះ មានត្រីឆ្ពិន ត្រីព្រលូង ត្រីសណ្ដាយ ត្រីប្រា សរុប ៤៥បែ បានងា.ប់អស់ ៦៧ តោន។

ក្នុងរបាយការណ៍ដដែល បានបញ្ជាក់ថា គិតត្រឹមរសៀលថ្ងៃទី៦ ខែមេសានេះស្ថានភាពបានធូរ​ស្រាល​ហើយ ដោយសារតែម្ចាស់បែត្រីទាំងនោះ បានអូសបែ​ត្រីរបស់ខ្លួន ចេញពីកន្លែង ចិញ្ចឹម យកមកដាក់នៅ​ទីទឹកជ្រៅ និងអូសចុះឡើងៗ។ ចំណែកខ្លះទៀត បានប្រើម៉ាស៊ីនបាញ់​ខ្យល់អុកស៊ីសែន បញ្ចូលក្នុងបែ​។

ក្រុមអាជីវករ ជាអ្នកចិញ្ចឹមត្រីទាំងនោះ បានសំណូមពរដល់អាជ្ញាធរខេត្ត សូមឲ្យពួកគាត់ដាក់បែ​ត្រីទាំងនោះ នៅទីទឹកជ្រៅ ជាបណ្ដោះអាសន្ន ទម្រាំដល់ពេលចាប់ត្រីលក់។

គួរបញ្ជាក់ដែរថា ចំពោះត្រី ដែល​បានងា.ប់ ពួកគាត់ខ្លះ ក៏ចែកឱ្យអ្នកជិតខាង ប្រឡាក់ ធ្វើប្រហុក ផ្អក។ ខ្លះទៀត ក៏មកយកលក់នៅទីផ្សារ ក្នុងតម្លៃថោក​។ ចំណែកឯត្រីខ្លះទៀត ទើបងា.ប់ថ្មីៗ ត្រូវ​បានក្លាសេ ដើម្បីយកចូលលក់​ក្នុងផ្សារ និងដឹកចេញ ទៅក្រៅខេត្ត៕