ឌី សូនីតា សម្រេចក្តីស្រមៃ ក្រោយឈ្នះការប្រកួតប្រឡងចម្រៀងលំដាប់ពិភពលោក
ឌី សូនីតា បានសម្រេចក្តីស្រមៃដ៏ធំនៅក្នុងឆាកជីវិតរបស់ខ្លួនហើយ បន្ទាប់ពីឈ្នះពានកម្មវិធីប្រឡងចម្រៀងលំដាប់ពិភពលោក I’m a singer Cambodia កាលពីរាត្រីថ្ងៃទី១៩ ខែវិច្ឆិកា ឆ្នាំ២០២២។
ស្រីស្អាត ឌី សូនីតា បានចូលរួមប្រកួតយ៉ាងស្វិតស្វាញនៅក្នុងកម្មវិធីខាងលើ ជាមួយតារាចម្រៀងអាជីពមួយចំនួន ដោយនាងបានទទួលការផ្ញើសារពីទស្សនិកជនច្រើនជាងគេនៅក្នុងវគ្គផ្តាច់ព្រ័ត្រ ដែលធ្វើអោយនាងមានឱកាសលើកពាននៅក្នុងកម្មវិធីដ៏ធំមួយនេះ។
ឌី សូនីតា បានតាំងចិត្តយ៉ាងរឹងមាំនៅក្នុងការប្រកួតប្រជែងនៅក្នុងកម្មវិធីខាងលើនេះ ខណៈពេលដែលនាងកំពុងជួបរឿងសោកសៅ ជួបរឿងប្រះឆាជាមួយនឹងគូស្នេហ៍ គឺលោក អេឡិច ហ្សូរ៉ា នាពេលនេះក៏ដោយ។ តារារូបនេះ មិនទាន់ចេញមុខបកស្រាយអោយមហាជនបានដឹងពីមូលហេតុនៃការបែកបាក់គ្នា ដោយបន្សល់ទុកកូនស្រីម្នាក់នៅឡើយទេ ដោយសារតែនាងចង់រក្សាអារម្មណ៍អោយល្អសម្រាប់ការប្រកួតកម្មវិធីខាងលើ ដែលនាងមានមហិច្ឆតាចង់ក្លាយជាម្ចាស់ពានមួយនេះ។
យ៉ាងណា ជាមួយនឹងការរំភើបលាយឡំទឹកភ្នែកនៅក្នុងឱកាសទទួលពានដ៏ធំមួយនេះ ស្រីស្អាត ឌី សូនីតា បានបង្ហោះសារនៅលើគណនីហ្វេសប៊ុករបស់ខ្លួនថា «ខ្ញុំធ្វើបានហើយបងប្អូនអើយ ខ្ញុំពិតជាអរគុណយ៉ាងក្រៃលែងដល់ការរួមចំណែកយ៉ាងធំធេងពីពុកម៉ែបងប្អូនដែលធ្វើអោយសុបិន្តខ្ញុំខ្លាចទៅជាការពិត»។ នាងថា «នៅយំនៅឡើយ ទះខ្លួនឯងបីបួនដៃពិតជាការពិតមែន ខ្ញុំឈ្នះខ្លួនឯងហើយ ខ្ញុំឈ្នះជីវិតដ៏កំសត់នេះហើយ ឈ្នះឧបសគ្គដ៏អាក្រក់នេះហើយ ឈ្នះដោយការប្រឹងទាំងមិនដែលចុះចាញ់»។
នាងបញ្ជាក់ថា «ខ្ញុំពិតជាអរគុណយ៉ាងជ្រាលជ្រៅដល់ក្រុមការងារហង្សមាសទាំងអស់ ដែលនៅពីក្រោយឆាក ស្ទើរតែគ្មានពេលសម្រាកសម្រាប់ខ្លួនឯង អរគុណដល់លោកគ្រូដ៏អស្ចារ្យរបស់នាងខ្ញុំ Mao Kithya-Frank . ដែលលើកទឹកចិត្តសិស្សគ្រប់ពេល ជាហ្វេនដំបូងគេរបស់សិស្សនៅក្នុងកម្មវិធីលំដាប់ថ្នាក់ពិភពលោកមួយនេះ។ អរគុណនូវបទពិសោធន៍ដ៏ធំ ដែលខ្ញុំទទួលបាននៅក្នុងឆាកជីវិតថ្ងៃនេះ 19.11.2022 ឌី សូនិត្តា បំបែកកំណត់ត្រាជីវិតនេះបានហើយ»។
ជាការកត់សម្គាល់ ក្រោយការលើកពានកម្មវិធី I’m a singer Cambodia នាពេលនេះ គេឃើញមានទស្សនិកជន មិត្តសិល្បករដូចគ្នា ជាពិសេសបណ្តាអ្នកគាំទ្របានចូលរួមសម្តែងការអបអរសាទរសម្រាប់ស្រីស្អាត ឌី សូនីតា យ៉ាងច្រើនផងដែរ៕
Post a Comment