ក្រសួងមហាផ្ទៃ អនុញ្ញាតឱ្យសង្គមស៊ីវិល ជួបជុំគ្នាប្រារព្ធទិវានារីអន្តរជាតិ តែមិនត្រូវមានសកម្មភាពនយោបាយ

រាជធានីភ្នំពេញ)៖ បន្ទាប់ពីសមាគម អង្គការមិនមែនរដ្ឋាភិបាល និងសហព័ន្ធសហជីពចំនួន១៦ សុំធ្វើការជួបជុំ​សម្តែងមតិ​នៅ​ទី​លាន​ប្រ​​ជាធិប​តេយ្យ ដើម្បីអបអរសាទទិវាអន្តរជាតិនារី លើកទី១១២ នៅថ្ងៃស្អែកនេះ ក្រសួងមហាផ្ទៃ បានអនុ​ញ្ញាតឱ្យក្រុមអង្គការសង្គមស៊ីវិលចំនួន៨រៀបចំ​ ប៉ុន្តែមិន​មែនជា​ស​កម្មភាព​នយោបាយ​ទេ។ នេះបើយោងតាមសេចក្តីជូនដំណឹងរបស់ក្រសួងមហាផ្ទៃ ថ្ងៃទី៧ ខែមីនា ឆ្នាំ២០២៣...។

សេចក្តីជូនដំណឹង បានឱ្យដឹងថា ក្រសួងមហាផ្ទៃ បានអនុញ្ញាតឱ្យសមាគម អង្គការមិនមែនរដ្ឋាភិបាល និងសហព័ន្ធ​ស​​ហជីពមួយចំនួន ធ្វើការជួបជុំសម្តែងមតិនៅទីលានប្រជាធិបតេយ្យ ដើម្បីអបអរសាទទិវានារីអន្តរជាតិ លើកទី១១២ នៅថ្ងៃ​ទី៨ ខែមីនា ឆ្នាំ២០២៣ ចាប់ពីម៉ោង០៧ៈ០០នាទី ដល់ម៉ោង១២ៈ៣០នាទី ដែលមានអ្នកចូលរួមចំនួន៥០០នាក់។​ ​​ក្រ​សួងមហាផ្ទៃ បានបញ្ជាក់ប្រាប់ក្រុមសង្គមស៊ីវិលទាំងនោះ មិនត្រូវប្រើប្រាស់កម្មវិធីខាងលើ ជាសកម្មភាពនយោបាយ ឬពាក់​ព័ន្ធនឹងគណបក្សនយោបាយណាមួយឡើយ។ ជាមួយគ្នានោះដែរ ក្រសួងមហាផ្ទៃបានស្នើឱ្យរដ្ឋបាលរាជធានីភ្នំពេញ ធ្វើការណែនាំដល់តំណាងសមាគម អង្គការមិនមែនរដ្ឋាភិបាល និង​ស​ហ​​​ព័ន្ធ​ស​ហជីព ត្រូវអនុវត្តឱ្យបានម៉ឺងម៉ាត់ស្របតាមខ្លឹមសារក្នុងកំណត់ហេតុនៃ កិច្ចប្រជុំដែលបានឯកភាពគ្នា និងលិខិតបទ​ដ្ឋាន​គតិ​យុត្តជាធរមាន ព្រមទាំងត្រូវបានការពារសន្តិសុខ សណ្ដាប់ធ្នាប់ សាធារណៈ ដោយការទទួលខុសត្រូវខ្ពស់ផងដែរ។

សូមរំលឹកផងដែរថា អង្គការសង្គមស៊ីវិល ដូចជា សហជីព សហព័ន្ធសហជីព អង្គការ និងសមាគមដែលកំ​ពុង​ធ្វើការ​ងារ​ដើម្បីលើកកម្ពស់សិទ្ធិស្ត្រី និងសមភាពយេនឌ័រនៅប្រទេសកម្ពុជា និងប្រារព្ធកម្មវិធីខួបលើកទី១១២ នៃទិវានារីអន្តរ​ជាតិ ក្រោម ប្រធានបទ «គាំពារស្ត្រីនិងក្មេងស្រី ដើម្បីយុត្តិធម៌ទាំងអស់គ្នា» នៅទីលានប្រជាធិបតេយ្យ។ គោលបំណងនៃការ​ប្រារព្ធកម្មវិធីនេះ​ គឺដើម្បី​រម្លឹ​កដល់ការតស៊ូ និងកិច្ចខិតខំប្រឹងប្រែងរបស់ស្ត្រី ក្មេងស្រី និងអ្នកការពារសិទ្ធិមនុស្ស ជាស្ត្រីនៅ​គ្រប់​វិស័យ ក៏ដូចជា​បង្ហា​ញ​ដល់សាធារណជនឱ្យបានជ្រាបអំពីតម្រូវការ បញ្ហាប្រឈមរបស់ស្ត្រី និងក្មេងស្រី ព្រមទាំងស្នើឱ្យរាជរដ្ឋាភិបាលដោះ​ស្រាយ​នូវតម្រូវការចាំបាច់ ទុក្ខកង្វល់ពាក់ព័ន្ធនឹងប្រព័ន្ធគាំពារសង្គម និងភាពអយុត្តិធម៌សម្រាប់ស្ត្រី និងក្មេងស្រីរងគ្រោះផងដែរ...៕