រដ្ឋមន្ត្រីព័ត៌មាន៖ ជិតបោះឆ្នោត មានព័ត៌មានក្លែងក្លាយច្រើន
ភ្នំពេញ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានលើកឡើងថា នៅជិតដល់ថ្ងៃបោះឆ្នោតនេះ មានព័ត៌មានក្លែងក្លាយច្រើន ដែលអ្នកកាសែត ក៏ដូចជាសាធារណជន ត្រូវបង្កើនការប្រុងប្រយ័ត្ន។
ក្នុងវេទិកាពិភាក្សា ដើម្បី «ពង្រឹងក្រមសីលធម៌នៃវិជ្ជាជីវៈសារព័ត៌មាន» រៀបចំដោយក្លឹបអ្នកកាសែតកម្ពុជា នារសៀលថ្ងៃទី២១ ខែមេសា ឆ្នាំ២០២៣ នៅវិទ្យាស្ថានជាតិអប់រំ ឬសាលាគរុកោសល្យ ជាប់វិមានឯករាជ្យ ក្នុងរាជធានីភ្នំពេញ លោក ខៀវ កាញារីទ្ធ បានថ្លែងថា «នៅជិតដល់ពេលបោះឆ្នោតនេះ ដំណឹងក្លែងក្លាយមានច្រើន។ យើងដឹងហើយថា ក្រសួងព័ត៌មាន កំពុងរៀបចំធ្វើវិសោធនកម្មច្បាប់ស្តីពីរបបសារព័ត៌មាន។ ប៉ុន្តែនៅពេលបោះឆ្នោតនេះ ក្រសួងនឹងរៀបចំចំណុចមួយសំខាន់បំផុត គឺអនុវត្តមាត្រាមួយ ដែលកំណត់ថា នៅពេលណាអ្នកកាសែតសរសេរខុស ហើយត្រូវគេទាមទារឱ្យកែតម្រូវ គឺត្រូវចុះផ្សាយទាំងស្រុង។ អីចឹងក្រសួងកំពុងរៀបចំកន្លែងហ្នឹង ដើម្បីក្នុងពេលបោះឆ្នោតនេះ។ បើសិនជាកាសែតនោះ មិនចុះផ្សាយនូវការកែតម្រូវទេ ក្រសួងនឹងត្រូវបិទអាជ្ញាប័ណ្ណ»។
ជាមួយនឹងការលើកឡើងដូច្នេះ លោករដ្ឋមន្ត្រី ខៀវ កាញារីទ្ធ ក៏ដូចជាវាគ្មិនជាច្រើនទៀត ដែលជាអ្នកកាសែតជើងចាស់ជាតិ និងអន្តរជាតិ បានក្រើនរម្លឹកដល់អ្នកកាសែតទាំងអស់ ត្រូវពង្រឹងក្រមសីលធម៌នៃវិជ្ជាជីវៈសារព័ត៌មាន។ ក្រមសីលធម៌នៃវិជ្ជាជីវៈសារព័ត៌មាន ដែលលោករដ្ឋមន្ត្រី ខៀវ កាញារីទ្ធ បញ្ជាក់ជាថ្មីថា គឺជាអាវក្រោះ សម្រាប់អ្នកកាសែត៕
Post a Comment