សម្តេច ហ៊ុន សែន អបអរសាទរសាសនិកឥស្លាមដែលបញ្ចប់នូវពិធីអំណត់បួស ខែរ៉ាម៉ាឌន
រាជធានីភ្នំពេញ៖ សម្តេចតេជា ហ៊ុន សែន នាយករដ្ឋមន្ត្រីកម្ពុជា អបអរសាទរ និងជូនពរជ័យសិរីសួស្ដីជូនដល់បងប្អូនសាសនិកខ្មែរឥស្លាមកម្ពុជា ក្នុងនិងក្រៅប្រទេស រួមទាំងបងប្អូនសាសនិកឥស្លាមនៅទូទាំងសាកលលោក ដែលបានបញ្ចប់នូវពិធីអំណត់បួសខែរ៉ាម៉ាឌនប្រកបដោយជោគជ័យ ហើយនឹងរីករាយស្វាគមន៍ថ្ងៃបុណ្យរ៉យ៉ាហ្វ៊ីទ្រី នៅថ្ងៃទី២២ ខែមេសា ឆ្នាំ២០២៣ នេះ។
សម្តេច ហ៊ុន សែន បានរំលេចសារតាមហ្វេសប៊ុកផ្លូវការថា៖ «ខ្ញុំសូមផ្ញើនូវក្តីនឹករលឹក និងអរគុណយ៉ាងជ្រាលជ្រៅបំផុតចំពោះបងប្អូនខ្មែរឥស្លាមកម្ពុជា ដែលបានចូលរួមថែរក្សាសុខសន្តិភាព រួមគ្នាជាមួយនឹងប្រជាជនកម្ពុជាដែលប្រកាន់យកសាសនាផ្សេងៗ»។
ជាពិសេស សម្ដេចក៏បានអរគុណដល់សាសនិកឥស្លាមទាំងអស់ដែលបានចូលរួមចំណែកជាមួយរាជរដ្ឋាភិបាល ក្នុងការការពារទប់ស្កាត់ការឆ្លងរីករាលដាលជំងឺរាតត្បាតកូវីដ-១៩ដោយជោគជ័យ ដោយគោរពអនុវត្តបានយ៉ាងខ្ជាប់ខ្ជួនទៅតាមច្បាប់ សេចក្តីសម្រេចសារាចរណែនាំ និងវិធានការនានារបស់រាជរដ្ឋាភិបាល ព្រមទាំងបងប្អូនខ្មែរឥស្លាមបានអនុវត្តតាមការណែនាំរបស់ចាងហ្វាងនៃគណៈដឹកនាំជាន់ខ្ពស់នៃសាសនាឥស្លាមកម្ពុជាផងដែរ ដែលកម្ពុជាទទួលបានជោគជ័យដ៏ធំធេងសម្រាប់ជាតិ។
ទោះបីកម្ពុជាទទួលបានជោគជ័យសមរភូមិក្នុងការប្រយុទ្ធប្រឆាំងនឹងជំងឺកូវីដ-១៩ ហើយរាជរដ្ឋាភិបាលទើបបានសម្រេចលើកលែងនូវកាតព្វកិច្ចមួយចំនួនបន្ថែមទៀត ពិសេសការលើកលែងកាតព្វកិច្ចពាក់ម៉ាស់ ធ្វើតេស្តរហ័សសម្រាប់ការជួបជុំក៏ដោយ ក៏ប៉ុន្ដែសម្តេចតេជា ហ៊ុន សែន នៅតែអំពាវនាវដល់បងប្អូន បន្តលើកកម្ពស់ការប្រុងប្រយ័ត្នអនុវត្ត ការពារ រក្សាអនាម័យឱ្យបានខ្ជាប់ខ្ជួនដើម្បីបងប្អូន គ្រួសារ និង ជាតិរបស់យើងផងដែរ។
គួរបញ្ជាក់ផងដែរថា ខែរ៉ាម៉ាឌន (Ramadan) ជាខែដែលអ្នកកាន់សាសនាឥស្លាមត្រូវបំពេញកាតព្វកិច្ចបួសនៅក្នុងខែដ៏ពិសិដ្ឋនេះ ពោលគឺតមចំណីអាហារ ឬបួស ដែលមានរយៈពេលមួយខែ។ ម្យ៉ាងវិញទៀតក្នុងខែនេះដែរ សាសនិកឥស្លាមទាំងអស់ក្រៅពីបំពេញកាតព្វកិច្ចបួសនេះហើយ ពួកគាត់ត្រូវបំពេញកាតព្វកិច្ច និងភារកិច្ចជាច្រើនទៀត រួមមាន៖ ការសូត្រធម៌ ឬគួរអាន ការបរិច្ចាគទានដល់ជនក្រីក្រ និងការផ្ដល់ចំណីអាហារឱ្យអ្នកបួសជាដើម៕
Post a Comment