​សម្តេចហ៊ុន សែន ចេញមុខ​ការពារ​ពលរដ្ឋ រឿងលោកស្រី តាំង ហ្គិចលៀង ថា «គីឡូធ្ងន់-គីឡូស្រាល»

សម្តេចតេជោ ហ៊ុន សែន នៅយប់ថ្ងៃទី៥ ខែមេសា ឆ្នាំ២០២៣ សម្តេចតេជោ បានបញ្ចេញវិដេអូខ្លីប​របស់លោកស្រី តាំង ហ្គិចលៀង ម្ចាស់ដើម «អ្នកមាន-អ្នកក្រ»។ លោកស្រី តាំង ហ្គិចលៀង បានថ្លែងសូមទោស​ជាសាធារណៈចំពោះពាក្យសម្តីរបស់លោកស្រីម្តងជាពីរដង ពាក់ព័ន្ធនឹង «អ្នកមាន-អ្នកក្រ» និងម្ចាស់ «គីឡូធ្ងន់-គីឡូស្រាល»។

សម្តេចតេជោ ហ៊ុន សែន បានចេញសារជាសំឡេង ដោយ មិនយល់ស្រប នឹង សារជាសំឡេងថ្មី របស់​លោកស្រី តាំង ហ្គិចលៀង ដែលបានប្រៀប​ធៀបប្រជាពលរដ្ឋ ដែលជាអ្នករិះគន់លើលោកស្រី ថាជាអ្នកមានគីឡូស្រាលៗ ​មិនអាច​ធ្វើអ្វីលោកស្រី បានទេ​។ សម្តេច​តេជោ ហ៊ុន សែន មិនយល់ស្របនឹងការប្រៀបធៀបប្រជាពលរដ្ឋ ថាប្រជាពលរដ្ឋ «គីឡូស្រាល» ហើយចាត់ទុកការប្រៀបធៀបរបស់លោកស្រី តាំង ហ្គិចលៀង ដូច្នេះ ថាជាការខុសឆ្គងធ្ងន់ធ្ងរ​។

សម្តេចតេជោ ហ៊ុន សែន បានប្រកាសហើយប្រកាសទៀត ឱ្យលោកស្រី តាំង ហ្គិចលៀង ដែលសម្តេចហៅថា ក្មួយស្រី ត្រូវឈប់បញ្ចេញមតិតទៅទៀត រឿងអ្នកមាន-អ្នកក្រ និងរឿង​គីឡូធ្ងន់-គីឡូស្រាល។

សម្តេចតេជោ បានទទួលស្គាល់​ពីការងារជួយ​សង្គមរបស់​លោកស្រី តាំង ហ្គិចលៀង កន្លងមក ហើយ​សម្តេច បានគូសបញ្ជាក់ថា លោកស្រី តាំង ហ្គិចលៀង ចេញសារសូមទោស​នាពេលនេះ គឺជាការល្អ និងត្រឹមត្រូវ​។

សម្តេចតេជោ ហ៊ុន សែន បានប្រកាស​ថា សម្តេចនៅឈរជាមួយប្រជាពលរដ្ឋ ហើយប្រជាពលរដ្ឋ តាំងពីឆ្នាំ១៩៧៩ មក មិនមាននរណា ជាអ្នកមានទេ។ អ្នកមាន ដាច់ពូជ​ហើយ​។ ពេលនេះ គឺជាអ្នកមានជាន់ថ្មី​។

សម្តេចតេជោ ហ៊ុន សែន ក៏បានប្រកាសអំពាវនាវជាថ្មី ឱ្យប្រជាពលរដ្ឋ បញ្ឈប់​វ៉ៃប្រហារគ្នា តាមបណ្តាញសង្គមតទៅទតៀ ហើយ​ប្រកាសឱ្យសមាជិកសមាជិកាគណបក្ស​ប្រជាជនកម្ពុជា ទទួលយកនូវការសូមទោស​របស់​លោកស្រី តាំង ហ្គិចលៀង។

សម្តេចតេជោ ហ៊ុន សែន ក៏បានណែនាំដល់​លោកស្រី តាំង ហ្គិចលៀង យករឿងនេះ ដើម្បីរៀននិយាយឡើងវិញ កុំ​ឱ្យប៉ះពាល់ដល់គ្រឹះមូលដ្ឋានរបស់ប្រទេស​ជាតិ គឺប្រជាជន​។

សម្តេចតេជោ ហ៊ុន សែន គូសបញ្ជាក់ថា «ខ្ញុំត្រូវបង្ខំចិត្ត ចេញសារទាំងយប់នេះ ក្នុងគោល​ដៅតែមួយគត់ ដើម្បីឱ្យមានការស្រុះស្រួលជាតិ គ្មានការបែកបាក់។ បុគ្គលម្នាក់ មិនអាច​ធ្វើឱ្យសង្គមរង្គោះរង្គើលទេ។ ក៏ប៉ុន្តែប្រសិនបើមិនទប់ស្កាត់ ភ្លើង​វណ្ណៈ​ ប្រឆាំងវណ្ណៈ ទំនាស់វណ្ណៈ ប្រឆាំងវណ្ណៈ តស៊ូវណ្ណៈ វានឹងផ្ទុះឡើង ដែលនឹងអាចក្លាយទៅជាវណ្ណៈ​សង្គមដ៏ធ្ងន់ធ្ងរ ដែល​ខ្ញុំព្រះករុណាខ្ញុំ ត្រូវតែចេញមក ដើម្បីការពារប្រជាពលរដ្ឋ ហើយក៏ទទួលយកនូវការសូម​ទោសរបស់​ក្មួយស្រី ហើយសូមឱ្យ​ក្មួយស្រី បញ្ឈប់មួយរយៈនេះ ព្រោះបើមិនអីចឹងទេ បន្តរឿង បន្តភាគ អត់ចេះចប់។ ប៉ុន្តែមិនមែនខុសមកពីអ្នកទិតៀនក្មួយទេ ខុសមកពីក្មួយ និយាយមិនបានត្រឹមត្រូវ ហើយនិយាយចុងក្រោយនេះ តាមរយៈសារឆ្លងឆ្លើយនោះ គឺបែបប្រមាថចំពោះប្រជាជន ដែលចាត់ទុកប្រជាជន ជាគីឡូស្រាល។ នេះជារឿងមិនត្រឹមត្រូវ»។

សម្តេច​តេជោ ហ៊ុន សែន ក៏បានផ្ញើសារបញ្ជាក់ទៅលោកស្រី តាំង ហ្គិចលៀង ថា «ប្រជាជន គឺជាទឹក យើងគឺជាទូក។ ទឹ​កអាចពន្លិចទូក។ សូមកុំភាន់ច្រលំថា ប្រជាជន គឺជាគីឡូស្រាលឱ្យសោះ។ យើងត្រូវបម្រើពួកគាត់។ នេះមិនមែនជាបញ្ហាតូចតាចនោះទេ»។

សម្តេចតេជោ ហ៊ុន សែន ក៏បានប្រកាសអំពាវនាវដល់​ប្រជាពលរដ្ឋ សូមបញ្ឈប់​ការរិះគន់តាម​បណ្តាញសង្គម​លើ​ករណីលោកស្រី កាំង ហ្គិចលៀង ចាប់ពីពេលនេះតទៅ៕​