កោដ្ឋដាក់អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ត្រូវបានតម្កល់ដាក់ក្នុងមហាចេតិយ (BTV)
ត្បូងឃ្មុំ៖ ប្រមុខការពារជាតិអញ្ជើញសម្ពោធឆ្លងមហាចេតិយតម្កល់អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា៤៩រូបនៅ X 16 តំបន់ប្រវត្តិសាស្ត្រយោធាតេជោកោះថ្ម។
នៅព្រឹកថ្ងៃទី ០២ ខែមេសា ឆ្នាំ២០២៣នេះ កោដ្ឋដាក់អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ចំនួន ៤៩រូប ត្រូវបានធ្វើពិធីដង្ហែតាមគន្លងប្រពៃណីសាសនាប្រកដោយកិត្តយស ដើម្បីកម្តល់ទុកនៅក្នុងមហាចេតិយ ដែលត្រូវបានសម្ភោធឆ្លងជាផ្លូវការក្នុងពេលដំណែលគ្នា ក្រោមវត្តមានសម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ តំណាងសម្តេចតេជោ ហ៊ុន សែន នាយករដ្ឋមន្ត្រី ដែលស្ថិតនៅតំបន់ប្រវត្តិសាស្ត្រ យោធាតេជោកោះថ្ម X-16 ស្ថិតនៅភូមិកោះថ្ម ឃុំទន្លូង ស្រុកមេមត់។
សម្តេចពិជ័យសេនា ទៀ បាញ់បានថ្លែងថា ការសាងសង់មហាចេតិយ និង ការតម្កល់នូវកោដ្ឋអដ្ឋិធាតុ យុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាចំនួន ៤៩រូប នៅពេលនេះ គឺសបញ្ជាក់ពីការយកចិត្តទុកដាក់ ការផ្តល់តម្លៃ និងកិត្តិយស ពីសំណាក់ថ្នាក់ដឹកនាំរាជរដ្ឋាភិបាលកម្ពុជា ចំពោះកងកម្លាំងយុទ្ធមិត្ត ដែលបានពលីជីវិតដើម្បីជាតិមាតុភូមិ តស៊ូរំដោះជាតិចេញពីរបបប្រល័យពូជសាសន៍កាលពីឆ្នាំ១៩៧៨។
បន្ថែមលើពីនេះ ដើម្បីរក្សាបាននូវតឹកតាងប្រវត្តិសាស្ត្រ ដែលមិនអាចប្រកែកបានចំពោះការលំបង់ដ៏ធំធេង ក្នុងការស្វែងរកសន្តិភាពជូនជាតិមាតុភូមិ។ បើទោះបីជាមកដល់ពេលនេះ កម្ពុជាទទួលបានសុខសន្តិភាពពេញលេញក៏ប៉ុន្តែសម្តេចតេជោហ៊ុនសែននាយករដ្ឋមន្ត្រី មិនដែលបោះបង់ និង បំភ្លេចចោលពួកគាត់ឡើយ។
សូមរំលឹកថា អដ្ឋិធាតុយុទ្ធជនកម្លាំងប្រដាប់អាវុធសាមគ្គីសង្គ្រោះជាតិកម្ពុជា ៤៩រូប ដែលត្រូវបានបូជា រួចត្រូវបានតម្កល់នៅក្នុងអគារមិត្តភាពជាបណ្តោះអាសន្នរង់ចាំរហូតដល់ពិធីឆ្លងមហាចេតិយរួច នឹងបានធ្វើពិធីរំកិលកោដិយុទ្ធជនទាំង៤៩រូបនោះ ទៅតម្កល់ទុកក្នុងមហាចេតិយទៅតាមការគ្រោងទុក។
អដ្ឋិធាតុយុទ្ធជនកម្លាំងប្រដាប់អាវុធសាមគ្គីសង្គ្រោះជាតិកម្ពុជា ៤៩រូប ត្រូវបានធ្វើពិធីប្រគល់ និងទទួល នៅតំបន់ប្រវត្តិសាស្ត្រយោធាតេជោកោះថ្ម X១៦ ក្រោមវត្តមាននាយឧត្តមសេនីយ៍ សៅ សុខា និងឧត្តមសេនីយ៍ឯកបម្រុង ដូ កាន់ អនុប្រធានស្នងការនយោបាយ នៃកងទ័ពប្រជាជនវៀតណាម ដំណាងក្រសួងការបរទេស នៃសាធារណៈរដ្ឋសង្គមនិយមវៀតណាម ព្រមទាំងកម្លាំងប្រដាប់អាវុធហត្ថអាជ្ញាធរដែនដីលោក លោកស្រី និងបងប្អូនប្រជាពលរដ្ឋប្រទេសទាំងពីរ កម្ពុជា-វៀតណាម។
ជាង ៤៤ឆ្នាំ បានកន្លងផុតទៅយុទ្ធមិត្ត ចំនួន ៤៩រូប ដែលបានពលី និងមរណៈពេលផ្តួលរំលំរបបប្រល័យពូជសាសន៍ ត្រូវបានមិត្តវៀតណាម ប្រមូលផ្តុំរៀបចំជាបូជនីយដ្ឋានយុទ្ធជនពលីកម្ពុជា ដោយបានការយកចិត្តទុកដាក់ផ្តល់ដីផ្តល់បណ្ណទទួលស្គាល់ ពីក្រសួងវប្បធម៌ ដោយទុកតំបន់នោះជាតំបន់ប្រវត្តិសាស្ត្រ។
អាជ្ញាធរដែនដីប្រជាជនវៀតណាមខេត្តដុងណាយ និងកងទ័ពវៀតណាម ពិសេសយោធភូមិភាគទី៧ កងពលធំលេខ៣០២ បានយកចិត្តទុកដាក់ថែទាំយ៉ាងល្អ។
ជារួមគិតត្រឹមថ្ងៃទី០២ ខែមេសា ឆ្នាំ២០២៣នេះ កោដ្ឋដាក់អដ្ឋិធាតុ យុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាចំនួន ៤៩រូប ត្រូវបានធ្វើពិធីចប់សព្វគ្រប់ប្រកបដោយកិត្តិយសជាទីបំផុត៕
Post a Comment