អតីតមេ CIA ថាទាល់តែលោកពូទីនស្លា.ប់ ទើបសង្គ្រាមអ៊ុយក្រែនចប់
“លោកពូទីនប្រៀបបាននឹងមនុស្សស្លាប់ដែលចេះកម្រើក។ ដូច្នេះ មានតែការបញ្ចប់ជីវិតរបស់គាត់តែប៉ុណ្ណោះ ទើបសង្គ្រាមអ៊ុយក្រែនអាចបញ្ចប់ទៅវិញជាស្ថាពរ” ជេមស៍ អូលសុន អតីតមេចារកម្មស៊ីអាយអេ។
លោកអូលសុនថ្លែងថាលោកពូទីនកំពុងដើរដល់ផ្លូវទាល់ ដែលគ្មានសង្ឃឹមថានឹងទទួលជ័យជម្នះនៅក្នុងសង្គ្រាមអ៊ុយក្រែនទេ។ លោកយល់ថាផ្លូវមាន២។ ទី១- សង្គ្រាមនឹងបន្តរ៉ាំរ៉ៃដោយគ្មានអ្នកឈ្នះ និងគ្មានអ្នកចាញ់ និងទី២- សង្គ្រាមអាចបិទបញ្ចប់ទៅវិញនៅពេលលោកពូទីនអស់អាយុសង្ខារ។ លោកយល់ថាដរាបណាលោកពូទីននៅមានជីវិតរស់នៅលើភពផែនដីនេះ, លោកមិនអាចចុះចាញ់សង្គ្រាមជាដាច់ខាត។ បានជាជ្រុលក្បាលក្រពើដល់ដំណាក់កាលនេះហើយ, លោកមិនអាចថយក្រោយវិញបានទេ។
លោកអូលសុននៅតែនិយាយដដែលឡើងវិញថានៅក្នុងសង្គ្រាមអ៊ុយក្រែននេះ ជម្រើសដែលសមស្របបំផុតមានតែមួយគត់គឺបញ្ចប់ជីវិតលោកពូទីន ឬបណ្ដេញគាត់ចេញពីអំណាចទើបអាចដោះស្រាយបញ្ហានេះបាន។
លោកអូលសុនយល់ថាលោកពូទីនគ្មានជម្រើសល្អសម្រាប់ខ្លួនទាល់តែសោះ។ ទោះជាគាត់ចង់ចេញទៅតាមច្រកណាក៏សុទ្ធតែមានបញ្ហាទាំងអស់។ មិនថានៅក្នុងចំណោមក្រុមមហាសេដ្ឋី, មន្ត្រីយោធា ឬអ្នកដែលចង់ងើបបះបោរប្រឆាំងនឹងរូបគាត់នោះទេ។
គិតទៅ, យុទ្ធជនរុស្ស៊ីស្លាប់ និងរបួសជាង១សែន ៧ម៉ឺននាក់ ប៉ុន្តែលោកពូទីនមិនទាន់សម្រេចទៅតាមគោលដៅដែលបានដាក់ចេញនៅឡើយទេ។ រុស្ស៊ីអាចដឹងដោយខ្លួនឯងថាខ្លួនកំពុងជាប់ផុងនៅក្នុងសង្គ្រាម។ ស្រួលមិនស្រួល, វាអាចនឹងក្លាយជាសង្គ្រាមរ៉៉ាំរ៉ៃដែលអូសបន្លាយពេលយូរអង្វែង និងបន្តឆក់យកជីវិតយុទ្ធជនដោយមិនដឹងថាថ្ងៃណាទើបបញ្ចប់ទៅវិញ។
ជោគវាសនារបស់លោកពូទីនអាចនឹងជួបរឿងល្អទៅបាន លុះត្រាតែរុស្ស៊ីឈ្នះសង្គ្រាម។ បើមិនដូច្នេះទេ, លោកអាចនឹងមានវាសនាអាក្រក់។ លោកអូលសុនសម្លឹងឃើញថាអ្វីៗគ្រប់យ៉ាងមិនប្រាកដជាអាចបញ្ចប់ទៅដោយរលូននោះទេសម្រាប់លោកពូទីន។
អតីតមេស៊ីអាយអេរូបនេះពន្យល់ថាលោកពូទីនស្មានខុស និងមានមោទកភាពខ្លាំង។ លោកស្មានថាកងទ័ពរុស្ស៊ីនឹងមានជោគជ័យនៅលើសមរភូមិព្រោះឧត្ដមសេនីយ៍កំពូលៗរបស់លោកពូកែបញ្ជាទ័ព។ ប៉ុន្តែជាក់ស្ដែង, អ្វីៗមិនដូចការស្មានទាល់តែសោះ។
លោកអូលសុនមានជំនឿថាលោកពូទីនមិនអាចឈ្នះសង្គ្រាមទេ ប៉ុន្តែលោកក៏មិនចុះចាញ់សង្គ្រាមដែរ។ លោកនឹងបញ្ជូនកងទ័ពទៅធ្វើសង្គ្រាមជាបន្តទៀត។ ដូច្នេះ ដរាបណាលោកពូទីនបន្តកាន់អំណាច, សង្គ្រាមនៅតែអូសបន្លាយគ្មានថ្ងៃបញ្ចប់។ ប៉ុន្តែលោកលោកពូទីនទំនងជាមិនអាចឈរជើងបានយូរទេ។ លោកអាចនឹងត្រូវគេដកហូតពីអំណាចនៅថ្ងៃណាមួយ។
សព្វថ្ងៃនេះមានចលនាប្រឆាំងនឹងលោកពូទីនក៏មិនតិចដែរនៅក្នុងជួរកងទ័ព, ក្រុមចារកម្ម និងពួកមហាសេដ្ឋីគ្រាក់ៗដែលធ្លាប់នៅជុំវិញលោកពូទីន។ ពួកគេចាប់ផ្ដើមរង្គាសចិត្តចំពោះលោកពូទីន។ តាំងពីយូរមកហើយ, លោកពូទីនរស់នៅទាំងមិនស្រណុកចិត្ត។ លោកខ្លាចមានចលនាបះបោរ ឬរដ្ឋប្រហារផ្ទៃក្នុង។ លោកអូលសុនយល់ថាលោកពូទីនកំពុងបំផ្លាញប្រទេសរុស្ស៊ី។ ជនជាតិរុស្ស៊ីដែលមានគំនិតស្នេហាជាតិពិតប្រាកដនឹងយល់ច្បាស់ថាគេទុកលោកពូទីនតទៅទៀតមិនកើតទេ។
សេណារីយោមានច្រើន។ លោកពូទីនអាចនឹងត្រូវគេដកហូតពីអំណាច ប៉ុន្តែមិនប៉ះពាល់ជីវិតរបស់គាត់ទេ។ លោកអូលសុនគិតថាការធ្វើឃាតលោកពូទីនក៏ជាសេណារីយាដែលអាចកើតឡើងផងដែរ។ លោកពូទីនចប់ពេលណា, សង្គ្រាមអ៊ុយក្រែនចប់ពេលហ្នឹង។ ជនជាតិរុស្ស៊ីរងទុក្ខរាល់ថ្ងៃ។ ពួកគេស្លាប់បង ស្លាប់ប្អូន ស្លាប់កូនរបស់ខ្លួនដោយសារសង្គ្រាមអ៊ុយក្រែន។ លោកពូទីនបង្ហូរឈាមជនជាតិរុស្ស៊ីជារៀងរាល់ថ្ងៃ។ ដូចនេះ គេមិនអាចបណ្ដោយឱ្យគាត់ធ្វើបែបនេះដោយគ្មានទីបញ្ចប់នោះទេ៕
Post a Comment