សង្ក្រាន្តវត្តភ្នំ ថ្ងៃទីពីរ កើនលើសទ្វេដង ប្រមាណ ៨០ម៉ឺននាក់
រាជធានីភ្នំពេញ៖ ទោះក្រោមកម្តៅថ្ងៃយ៉ាងណា ក៏បងប្អូនប្រជាពលរដ្ឋ នាំគ្នាសម្រុកទៅលេងកម្សាន្តសប្បាយយ៉ាងច្រើនកុះករ នាសង្ក្រាន្តវត្តភ្នំ សម្រាប់ថ្ងៃទីពីរ គឺកើនលើសទ្វេដង បើប្រៀបធៀបទៅនឹងថ្ងៃទីមួយ គឺថ្ងៃទីមួយ ប្រមាណ ៤០ម៉ឺននាក់ និងថ្ងៃទីពីរប្រមាណ ៨០ម៉ឺននាក់ នៅរមណីយដ្ឋានវប្បធម៌ប្រវត្តិសាស្រ្តវត្តភ្នំ ប្រកបដោយភាតរភាព និងភាពស្និទ្ធស្នាលក្រៃលែង។
លោក ជុំ វុឌ្ឍី ប្រធានមន្ទីរវប្បធម៌ និងវិចិត្រសិល្បៈ រាជធានីភ្នំពេញ បានឲ្យកោះសន្តិភាពដឹងមុននេះបន្តិចថា សម្រាប់ថ្ងៃទីពីរនៃសង្ក្រាន្តវត្តភ្នំនេះ ទោះបីធាតុអាកាសក្តៅបន្តិចយ៉ាងណា ក៏បងប្អូនប្រជាពលរដ្ឋនាំគ្នាសម្រុកទៅលេងកម្សាន្តសប្បាយយ៉ាងច្រើនកុះករ នាសង្ក្រាន្តវត្តភ្នំសម្រាប់ថ្ងៃទីពីរ គឺលំហូរមនុស្សមានច្រើន ចាប់ពីម៉ោង ៣រសៀល រហូតដល់ម៉ោង ៩យប់ ក៏នៅតែមានមនុស្ស ចូលលេងជាបន្តបន្ទាប់ទៀត គឺកើនលើសទ្វេដង បើប្រៀបធៀបទៅនឹងថ្ងៃទីមួយ។ ពោលគឺថ្ងៃទីមួយ មានប្រមាណ ៤០ម៉ឺននាក់ និងថ្ងៃទីពីរ មានប្រមាណ ៨០ម៉ឺននាក់ឯណោះ។
លោកបន្តថា មនុស្សពេញលើដងផ្លូវ និងសួនច្បារ ចាប់តាំងពីមុខពេទ្យអង្គឌួង និងតំបន់ជុំវិញវត្តភ្នំ ក៏ពេញ។ ចំណែកនៅខាងក្នុងបរិវេណវត្តភ្នំវិញ គឺពេញណែនតែម្តង ដែលបងប្អូនប្រជាពលរដ្ឋយើងលេងកម្សាន្ដយ៉ាងសប្បាយរីករាយ និងប្រកបដោយភាពស្និទ្ធស្នាលក្រៃលែង។
សង្ក្រាន្តវត្តភ្នំ នឹងប្រារព្ធឡើង ១ថ្ងៃទៀត នៅថ្ងៃទី១៦មេសា ដែលជាថ្ងៃទី៣ នៃពិធីបុណ្យចូលឆ្នាំថ្មី ប្រពៃណីជាតិ៕
Post a Comment